qasr-e-viran

Duubā shafaq kī jhiil meñ ḳhurshīd-e-ḳhāvarī

añgḌā.ī le ke ġharb se laila-e-shab uThī

mahke hue chaman kī havā.eñ udaas haiñ

kyā kho chukī haiñ aaj fazā.eñ udaas haiñ

khiḌkī meñ āsmān kī hairāñ hai chāñd bhī

shāyad mirī tarah se pareshāñ hai chāñd bhī

soī huī bahār ke chehre pe yaas hai

ġhamgīn dil kī tarah gulistāñ udaas hai

aatī nahīñ hai duur se koyal kī ab sadā

gaatī nahīñ hai giit masarrat ke ab havā

ye ghar aur is ke gird jo shai hai udaas hai

jo murdanī hai dil meñ vahī aas paas hai

har saal aa ke dekhtā huuñ tere ghar ko maiñ

ab tak aziiz huuñ tire dīvār-o-dar ko maiñ

suntā huuñ ab bhī yaañ tire qadmoñ kī maiñ sadā

aa aa ke DhūñDhtī hai tujhe yaañ mirī nigah

jis ghar par hukmarāñ tire jalvaoñ kī thī bahār

vo ghar banā hai merī mohabbat kā ab mazār

Duba shafaq ki jhil mein KHurshid-e-KHawari

angDai le ke gharb se laila-e-shab uThi

mahke hue chaman ki hawaen udas hain

kya kho chuki hain aaj fazaen udas hain

khiDki mein aasman ki hairan hai chand bhi

shayad meri tarah se pareshan hai chand bhi

soi hui bahaar ke chehre pe yas hai

ghamgin dil ki tarah gulistan udas hai

aati nahin hai dur se koyal ki ab sada

gati nahin hai git masarrat ke ab hawa

ye ghar aur is ke gird jo shai hai udas hai

jo murdani hai dil mein wahi aas pas hai

har sal aa ke dekhta hun tere ghar ko main

ab tak aziz hun tere diwar-o-dar ko main

sunta hun ab bhi yan tere qadmon ki main sada

aa aa ke DhunDhti hai tujhe yan meri nigah

jis ghar par hukmaran tere jalwaon ki thi bahaar

wo ghar bana hai meri mohabbat ka ab mazar