sahab ki bipta

ḳhānsāmāñ hai musir har shab chikan banvā.iye

hāzirī par ''hāzir o ġhā.eb TamāTar'' khā.iye

jeb kahtī hai chhurī kāñTe faqat khaḌkā.iye

lunch pe shaljam dinner meñ tauriyāñ farmā.iye

matbaḳhoñ meñ būe-jūe-mūliyāñ Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

khurdure polish se ḳhasta boot chamkā.eñge kyā

''taḳht-poshī darziyoñ'' se suiT sil jā.eñge kyā

ham ne ye maanā ki dillī meñ raheñ khā.eñge kyā

bīviyoñ ko koī samjhā.e ki samjhā.eñge kyā

baj rahī haiñ jin kī ḳhālī chūḌiyāñ Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

mil gayā bañgla muqaddar se to hariyālī nahīñ!

hazrat vaalā ne kuttī ghaas tak paalī nahīñ

is bayābāñ meñ koī buuTā nahīñ Daalī nahīñ

aah ye koThī ki vīrāñ hai magar ḳhālī nahīñ

luT ga.e sab is ke ''gamle gamliyāñ'' Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

leaderī kā shauq zauq-e-mīnā-bāzārī bhī hai

ghar kī majbūrī bhī jym-ḳhāne kī lāchārī bhī hai

film par tanqīd farmāne kī bīmārī bhī hai

har adā begam kī mahñgī hai magar pyārī bhī hai

ishq aur andesha-e-sūd-o-ziyāñ Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

vālid-e-mājid kā tanz-e-talḳh-o-paiham aur ham

māmtā kā dīda-e-bedār pur-nam aur ham

mustaqil rūThī huī begam kī bam-bam aur ham

ghar meñ hai phailī huī aulād-e-ādam aur ham

sargirāñ haiñ jin kī mailī Topiyāñ Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

ho chuke haiñ jab se nainital o dehradōn band

box meñ haiñ jodhpurī coat aur patlūn band

sāġhar o miinā meñ ajmal-ḳhān kī mājūn band

sub.h ke mazmūn sākit shaam ke shab-ḳhūn band

jaao jamunā par bajāo ghanTiyāñ Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

yād-e-ayyāme ki bāzāroñ meñ arzānī bhī thī

nau-e-insānī meñ kuchh taufīq-e-nādānī bhī thī

naukrī meñ bandagī to thī sulaimānī bhī thī

din kī mehnat thī magar rātoñ kī sultānī bhī thī

ai mire dil! Tan-Tanan! ai merī jaañ Tan-Tan miyāñ

dev kī nandan ho yā gul-sher-ḳhāñ Tan-Tan miyāñ

KHansaman hai musir har shab chikan banwaiye

haziri par hazir o ghaeb TamaTar khaiye

jeb kahti hai chhuri kanTe faqat khaDkaiye

lunch pe shaljam dinner mein tauriyan farmaiye

matbaKHon mein bue-jue-muliyan Tan-Tan miyan

dew ki nandan ho ya gul-sher-KHan Tan-Tan miyan

khurdure polish se KHasta boot chamkaenge kya

taKHt-poshi darziyon se suiT sil jaenge kya

hum ne ye mana ki dilli mein rahen khaenge kya

biwiyon ko koi samjhae ki samjhaenge kya

baj rahi hain jin ki KHali chuDiyan Tan-Tan miyan

dew ki nandan ho ya gul-sher-KHan Tan-Tan miyan

mil gaya bangla muqaddar se to hariyali nahin!

hazrat wala ne kutti ghas tak pali nahin

is bayaban mein koi buTa nahin Dali nahin

aah ye koThi ki viran hai magar KHali nahin

luT gae sab is ke gamle gamliyan Tan-Tan miyan

dew ki nandan ho ya gul-sher-KHan Tan-Tan miyan

leaderi ka shauq zauq-e-mina-bazari bhi hai

ghar ki majburi bhi jym-KHane ki lachaari bhi hai

film par tanqid farmane ki bimari bhi hai

har ada begam ki mahngi hai magar pyari bhi hai

ishq aur andesha-e-sud-o-ziyan Tan-Tan miyan

dew ki nandan ho ya gul-sher-KHan Tan-Tan miyan

walid-e-majid ka tanz-e-talKH-o-paiham aur hum

mamta ka dida-e-bedar pur-nam aur hum

mustaqil ruThi hui begam ki bam-bam aur hum

ghar mein hai phaili hui aulad-e-adam aur hum

sargiran hain jin ki maili Topiyan Tan-Tan miyan

dew ki nandan ho ya gul-sher-KHan Tan-Tan miyan

ho chuke hain jab se nainital o dehradoon band

box mein hain jodhpuri coat aur patlun band

saghar o mina mein ajmal-KHan ki majun band

subh ke mazmun sakit sham ke shab-KHun band

jao jamuna par bajao ghanTiyan Tan-Tan miyan

dew ki nandan ho ya gul-sher-KHan Tan-Tan miyan

yaad-e-ayyame ki bazaron mein arzani bhi thi

nau-e-insani mein kuchh taufiq-e-nadani bhi thi

naukri mein bandagi to thi sulaimani bhi thi

din ki mehnat thi magar raaton ki sultani bhi thi

ai mere dil! Tan-Tanan! ai meri jaan Tan-Tan miyan

dew ki nandan ho ya gul-sher-KHan Tan-Tan miyan