sanam ke jaur-e-taghaful ka kuchh hisab nahin

sanam ke jaur-e-taġhāful kā kuchh hisāb nahīñ

hazār taar ravāna karo javāb nahīñ

Tapak paḌī hai tire muñh se raal kyuuñ ai jaañ

ye hai mirā jigar-e-soḳhta kabāb nahīñ

ruḳh-e-habīb pe parda paḌā hai powder kā

vo be-naqāb bhī hai phir bhī be-naqāb nahīñ

tum is ġharīb ko karte ho kyuuñ sadā pāmāl

ye merā dil hai slēper nahīñ jurāb nahīñ

gilās uThāo piyo bad-gumāniyāñ na karo

ye ras-bharī hai mirī jaañ koī sharāb nahīñ

pahan ke aa.e haiñ vo gas-mask mere ghar

vo sāmne haiñ nazar phir bhī kāmyāb nahīñ

sanam ke jaur-e-taghaful ka kuchh hisab nahin

hazar tar rawana karo jawab nahin

Tapak paDi hai tere munh se ral kyun ai jaan

ye hai mera jigar-e-soKHta kabab nahin

ruKH-e-habib pe parda paDa hai powder ka

wo be-naqab bhi hai phir bhi be-naqab nahin

tum is gharib ko karte ho kyun sada pamal

ye mera dil hai sleeper nahin jurab nahin

gilas uThao piyo bad-gumaniyan na karo

ye ras-bhari hai meri jaan koi sharab nahin

pahan ke aae hain wo gas-mask mere ghar

wo samne hain nazar phir bhi kaamyab nahin