شادی کے بعد

شادی تو ہو گئی ہے مگر اب یہ حال ہے

پاکٹ میں کوئی پیسہ نہیں بس رومال ہے

ننانوے کے پھیر میں ایسے پھنسے کہ اب

بیگم کی کوئی فکر نہ اپنا خیال ہے

تنخواہ کم ہے اور بہت گھر کا خرچ ہے

دن رات بس زبان پہ یہ ہی سوال ہے

درگت بنے ہے چائے میں بسکٹ کی جس طرح

شادی کے بعد لوگو وہی میرا حال ہے

ڈرتا ہوں یوں کہ ڈانٹ نہ پڑ جائے پھر کہیں

بیگم کی بات ٹالوں مری کیا مجال ہے

بیگم کی لعن طعن ہے اور میری شاعری

اک شعر گھر میں بیٹھ کے کہنا محال ہے

کہتی ہے مجھ سے جھونک دو چولھے میں شاعری

یہ شاعری نہیں مری سوتن چھنال ہے