shaitan aadha rah gaya

fat.h karne ke liye maidān aadhā rah gayā

aadhā puurā ho gayā armān aadhā rah gayā

qarz jatanoñ ne liye the ho ga.e sab lāpata

sham.a kī mānind ghul kar ḳhaan aadhā rah gayā

congress aur jantādal meñ baT ga.e suube tamām

phir to yuuñ kahiye ki hindostān aadhā rah gayā

māntā huuñ maiñ ki terī mezbānī kam na thī

lauT kar phir kyuuñ tirā mehmān aadhā rah gayā

sarhadoñ par jañg kā anjām thā sar par savār

Dar ke maare fauj kā kaptān aadhā rah gayā

terā aadhā kaam ḳhud insān hī karne lage

kaam terā ab to ai shaitān aadhā rah gayā

aap kī aise meñ āḳhir maiñ tavāzo kyā karūñ

aap ke aa.e qadam jab naan aadhā rah gayā

bārhā maiñ kah chukā us chor se hoshyār rah

tere kamre kā har ik sāmān aadhā rah gayā

naaj jitnā thā vo sab mukhiyā kī bhaiñseñ char ga.iiñ

aur kallū-rām kā khaliyān aadhā rah gayā

vālida raazī haiñ un kī aur vālid haiñ ḳhafā

ab to shādī kā mirī imkān aadhā rah gayā

aah ab do chārpā.ī kī bhī gunjā.ish nahīñ

khiñch ga.ī dīvār aur dālān aadhā rah gayā

laḌ-jhagaḌ kar 'pāpular' vo apne ghar ko chal diyā

shā.erī ruḳhsat huī dīvān aadhā rah gayā

fath karne ke liye maidan aadha rah gaya

aadha pura ho gaya arman aadha rah gaya

qarz jatanon ne liye the ho gae sab lapata

shama ki manind ghul kar KHan aadha rah gaya

congress aur jantadal mein baT gae sube tamam

phir to yun kahiye ki hindostan aadha rah gaya

manta hun main ki teri mezbani kam na thi

lauT kar phir kyun tera mehman aadha rah gaya

sarhadon par jang ka anjam tha sar par sawar

Dar ke mare fauj ka kaptan aadha rah gaya

tera aadha kaam KHud insan hi karne lage

kaam tera ab to ai shaitan aadha rah gaya

aap ki aise mein aaKHir main tawazo kya karun

aap ke aae qadam jab nan aadha rah gaya

barha main kah chuka us chor se hoshyar rah

tere kamre ka har ek saman aadha rah gaya

naj jitna tha wo sab mukhiya ki bhainsen char gain

aur kallu-ram ka khaliyan aadha rah gaya

walida raazi hain un ki aur walid hain KHafa

ab to shadi ka meri imkan aadha rah gaya

aah ab do chaarpai ki bhi gunjaish nahin

khinch gai diwar aur dalan aadha rah gaya

laD-jhagaD kar 'papular' wo apne ghar ko chal diya

shaeri ruKHsat hui diwan aadha rah gaya