sharabi aur faqir

muDbheḌ merī ho ga.ī kal ik faqīr se

vo bhiik māñgtā thā har ik rāhgīr se

maiñ ne kahā ki bhaa.ī hai kaisā tumhārā haal

kahne lagā ki hai karam rabb-e-zul-jalāl

maiñ ne kahā ki race bhī khelī kabhī kahīñ

kahne lagā ki race to khelī kabhī nahīñ

maiñ ne kahā ki tāshoñ se kuchh mashġhala rahā

kahne lagā ki maiñ nahīñ khelā kabhī joh

maiñ ne kahā ki gāñjā bharī cigaretteñ bhī piiñ

bolā baḌe vaqār se hargiz kabhī nahīñ

maiñ kahā sharāb kabhī pī hai yā nahīñ

kahne lagā sharāb barī shai hai bil-yaqīñ

maiñ ne kahā ki phir mire ghar tak chale chalo

maiñ das rupa.e kā note abhī dūñgā aao to

kahne lagā ye ghar pe zarūrī hai kyā karam

denā agar hai tujh ko to de de yahīñ raqam

maiñ ne kahā na uzr karo merī baat se

tum ko milā.ūñgā maiñ sharīk-e-hayāt se

tum se milā ke apnī sharīk-e-hayāt ko

jhagḌe se tamām ḳhatm karūñgā uTho chalo

hai saaf saaf baat daġhā hai na is meñ khoT

itnī sī baat kah ke maiñ de dūñgā das kā note

biivī kī baat kā mujhe denā hai ik javāb

vo bhiik māñgtā hai jo piitā nahīñ sharāb

muDbheD meri ho gai kal ek faqir se

wo bhik mangta tha har ek rahgir se

main ne kaha ki bhai hai kaisa tumhaara haal

kahne laga ki hai karam rabb-e-zul-jalal

main ne kaha ki race bhi kheli kabhi kahin

kahne laga ki race to kheli kabhi nahin

main ne kaha ki tashon se kuchh mashghala raha

kahne laga ki main nahin khela kabhi joh

main ne kaha ki ganja bhari cigaretten bhi pin

bola baDe waqar se hargiz kabhi nahin

main kaha sharab kabhi pi hai ya nahin

kahne laga sharab bari shai hai bil-yaqin

main ne kaha ki phir mere ghar tak chale chalo

main das rupae ka note abhi dunga aao to

kahne laga ye ghar pe zaruri hai kya karam

dena agar hai tujh ko to de de yahin raqam

main ne kaha na uzr karo meri baat se

tum ko milaunga main sharik-e-hayat se

tum se mila ke apni sharik-e-hayat ko

jhagDe se tamam KHatm karunga uTho chalo

hai saf saf baat dagha hai na is mein khoT

itni si baat kah ke main de dunga das ka note

biwi ki baat ka mujhe dena hai ek jawab

wo bhik mangta hai jo pita nahin sharab