shirini-e-ras-dar

shīrīñ hai rasīlī hai mazedār bahut hai

har fard ise khāne ko tayyār bahut hai

ḳhush-rang hai ḳhush-rū hai ye ḳhush-ḳhulq hai lā-raib

jo khaa.e ise lutf se sarshār bahut hai

hai sāḳht meñ pechīda magar asl meñ sīdhī

fitrat kī bhalī tab.a meñ hamvār bahut hai

saada sī hai sūrat to damaktī huī rangat

is ke liye bas itnā hī singhār bahut hai

khāte hī halāvat kā dahan meñ ho baserā

is ke liye thoḌī sī hī miqdār bahut hai

gūnā-gūñ haiñ ausāf jinheñ mānte haiñ sab

bas vo nahīñ shāmil jinheñ pindār bahut hai

jo fard ise dekhte hī chīñ-ba-jabīñ ho

zāhir hai ki jiine se vo bezār bahut hai

kuchh to ise halvā.ī kī dukkān pe khā.eñ

kuchh ko ye amal karte hue aar bahut hai

kyā ġham hai jo shopper pe hai sarkār kī bandish

halvā.ī kī tahvīl meñ aḳhbār bahut hai

ye yaad rakheñ khāne meñ rakhnā hai tavāzun

jo bhūlā vo amrāz se do-chār bahut hai

amrāz ko hargiz na vafādār banā.eñ

varna ye rah-e-zindagī pur-ḳhār bahut hai

go ab to ta.āruf kī zarūrat nahīñ chandāñ

hai naam jalebī agar isrār bahut hai

shirin hai rasili hai mazedar bahut hai

har fard ise khane ko tayyar bahut hai

KHush-rang hai KHush-ru hai ye KHush-KHulq hai la-raib

jo khae ise lutf se sarshaar bahut hai

hai saKHt mein pechida magar asl mein sidhi

fitrat ki bhali taba mein hamwar bahut hai

sada si hai surat to damakti hui rangat

is ke liye bas itna hi singhaar bahut hai

khate hi halawat ka dahan mein ho basera

is ke liye thoDi si hi miqdar bahut hai

guna-gun hain ausaf jinhen mante hain sab

bas wo nahin shamil jinhen pindar bahut hai

jo fard ise dekhte hi chin-ba-jabin ho

zahir hai ki jine se wo bezar bahut hai

kuchh to ise halwai ki dukkan pe khaen

kuchh ko ye amal karte hue aar bahut hai

kya gham hai jo shopper pe hai sarkar ki bandish

halwai ki tahwil mein aKHbar bahut hai

ye yaad rakhen khane mein rakhna hai tawazun

jo bhula wo amraaz se do-chaar bahut hai

amraaz ko hargiz na wafadar banaen

warna ye rah-e-zindagi pur-KHar bahut hai

go ab to taaruf ki zarurat nahin chandan

hai nam jalebi agar israr bahut hai