shikwa-e-clerk

kyuuñ maiñ ghāTe meñ rahūñ sūd-farāmosh rahūñ

mauqa.a mil jaa.e to daftar meñ hī mad.hosh rahūñ

DaañT afsar kī sunūñ aur hama-tan-gosh rahūñ

''ham-navā'' maiñ bhī koī gul huuñ ki ḳhāmosh rahūñ

''maska-bāzī'' ke sabab tāb-e-suḳhan hai mujh ko

dar-haqīqat bahut arsa se ghuTan hai mujh ko

hai bajā kaam kī chorī meñ to mash.hūr haiñ ham

peT rishvat se jo bharte haiñ to majbūr haiñ ham

aañkh ke andhe haiñ kānoñ se bhī ma.azūr haiñ ham

''boss'' kī nit-na.ī dhamkī se bhī ranjūr haiñ ham

mire afsar mire aaqā tū ye da.avā sun le

apnī aadat ko na chhoḌeñge tū itnā sun le

thī to maujūd azal hī se ye rishvat kī phaban

ye buzurgoñ kī rivāyat ye buzurgoñ kā chalan

kaise kah duuñ ki mujhe hotī hai is se uljhan

ye maza vo hai ki aadī haiñ mire kām-o-dahan

ham pe ġhaflat huī taarī to ''corruption'' bhī savār

laakh rotī rahī public na sunī us kī ''pukār''

khāyā ohde kī badaulat jo hazāroñ kā udhār

ek hī kes meñ karne lage ham beḌā paar

haa.e afsos vahī ''lens'' ne ham ko pakḌā

zindagī bhar ke liye ho gayā qaa.em jhagḌā

ham to ullū haiñ tirī dhoñs meñ rahte hī rahe

jis taraf tū ne kahā josh meñ bahte hī rahe

phir bhī kyuuñ aañkh dikhātā hai tū DañDā le kar

kyā nahīñ ḳhush tirā jī rūpiyoñ kā baTvā le kar

apnī ''taḌ'' apnī anā ko bhī miTāyā ham ne

ḳhol chehre pe ġhulāmī kā chaḌhāyā ham ne

hukm afsar kā bahar-hāl bajāyā ham ne

us ke chamchoñ ko bahut maal chaTāyā ham ne

phir bhī afsar ko gila hai ki vafādār nahīñ

ham vafādār nahīñ vo bhī to dil-dār nahīñ

kyun main ghaTe mein rahun sud-faramosh rahun

mauqa mil jae to daftar mein hi madhosh rahun

DanT afsar ki sunun aur hama-tan-gosh rahun

ham-nawa main bhi koi gul hun ki KHamosh rahun

maska-bazi ke sabab tab-e-suKHan hai mujh ko

dar-haqiqat bahut arsa se ghuTan hai mujh ko

hai baja kaam ki chori mein to mashhur hain hum

peT rishwat se jo bharte hain to majbur hain hum

aankh ke andhe hain kanon se bhi mazur hain hum

boss ki nit-nai dhamki se bhi ranjur hain hum

mere afsar mere aaqa tu ye dawa sun le

apni aadat ko na chhoDenge tu itna sun le

thi to maujud azal hi se ye rishwat ki phaban

ye buzurgon ki riwayat ye buzurgon ka chalan

kaise kah dun ki mujhe hoti hai is se uljhan

ye maza wo hai ki aadi hain mere kaam-o-dahan

hum pe ghaflat hui tari to corruption bhi sawar

lakh roti rahi public na suni us ki pukar

khaya ohde ki badaulat jo hazaron ka udhaar

ek hi kes mein karne lage hum beDa par

hae afsos wahi lens ne hum ko pakDa

zindagi bhar ke liye ho gaya qaem jhagDa

hum to ullu hain teri dhons mein rahte hi rahe

jis taraf tu ne kaha josh mein bahte hi rahe

phir bhi kyun aankh dikhata hai tu DanDa le kar

kya nahin KHush tera ji rupiyon ka baTwa le kar

apni taD apni ana ko bhi miTaya hum ne

KHol chehre pe ghulami ka chaDhaya hum ne

hukm afsar ka bahar-haal bajaya hum ne

us ke chamchon ko bahut mal chaTaya hum ne

phir bhi afsar ko gila hai ki wafadar nahin

hum wafadar nahin wo bhi to dil-dar nahin