siyah zulf ko jo ban-sanwar ke dekhte hain

siyāh zulf ko jo ban-sañvar ke dekhte haiñ

safed baal kahāñ apne sar ke dekhte haiñ

sunā hai fees hai kuchh us se baat karne kī

ye fees kyā hai abhī baat kar ke dekhte haiñ

sunā hai log siyah-fām mah-jabīnoñ ko

lagā ke dhuup meñ chashme nazar ke dekhte haiñ

sunā hai jeb meñ muflis bhī maal rakhte haiñ

so muflisoñ kī bhī jebeñ katar ke dekhte haiñ

sunā hai shauq hai un ko bhī ghuḌ-savārī kā

jo duur se khaḌe ġhamze shutar ke dekhte haiñ

sunā hai apnī basīrat pe naaz hai un ko

jo raat ko bhī ujāle sahar ke dekhte haiñ

sunā hai ishq meñ mushkil hai matric karnā

result kuchh bhī sahī form bhar ke dekhte haiñ

adīb-o-shā.er-o-fankār bote haiñ jo shajar

ye log phal kahāñ apne shajar ke dekhte haiñ

sunā hai marne ke ba.ad un kī qadr hotī hai

so chand din ke liye ham bhī mar ke dekhte haiñ

siyah zulf ko jo ban-sanwar ke dekhte hain

safed baal kahan apne sar ke dekhte hain

suna hai fees hai kuchh us se baat karne ki

ye fees kya hai abhi baat kar ke dekhte hain

suna hai log siyah-fam mah-jabinon ko

laga ke dhup mein chashme nazar ke dekhte hain

suna hai jeb mein muflis bhi mal rakhte hain

so muflison ki bhi jeben katar ke dekhte hain

suna hai shauq hai un ko bhi ghuD-sawari ka

jo dur se khaDe ghamze shutar ke dekhte hain

suna hai apni basirat pe naz hai un ko

jo raat ko bhi ujale sahar ke dekhte hain

suna hai ishq mein mushkil hai matric karna

result kuchh bhi sahi form bhar ke dekhte hain

adib-o-shaer-o-fankar bote hain jo shajar

ye log phal kahan apne shajar ke dekhte hain

suna hai marne ke baad un ki qadr hoti hai

so chand din ke liye hum bhi mar ke dekhte hain