siyahat-e-zarif

kuchh rail-ghar kā haal karūñ muḳhtasar bayāñ

vo nau-baje kā vaqt vo hañgāme kā samāñ

quliyoñ kā laad laad ke laanā vo peTiyāñ

bajnā vo ghanTiyoñ kā vo engine kī sīTiyāñ

gaḌ-baḌ musāfiroñ kī bhī ik yādgār thī

aurat pe mard mard pe aurat savār thī

al-qissa rail jab sū-e-jhansi ravāñ huī

aur shakl lucknow kī nazar se nihāñ huī

jo third meñ the un ke liye bhī amaañ huī

panjoñ pe dhakke khā ke jagah kuchh ayaañ huī

thā tīsrā pahar na ba-ḳhūbī huī thī shaam

chhūTā jo saath rail kā ham sab se vassalām

ya.anī savād-e-bamba.ī us dam nazar paḌā

Thahrī train ik ek musāfir utar paḌā

kuchh bamba.ī kā haal karūñ muḳhtasar bayāñ

chauḌī saḌak do-rūya ka.ī manzile makāñ

har-sū miloñ kā shahr meñ phailā huā dhuāñ

har ek maale ke liye das biis sīḌhiyāñ

kamra har ek kaaTh kā piñjra silā huā

har ik makīñ phañdīt ho jaise palā huā

baiThe uThe vahīñ pe vahīñ khānā bhī pakā.e

muñh haath dho.e chāhe vahīñ baiTh kar nahā.e

sone ke vāste na masahrī agar bichhā.e

phaileñ na pair guñDlī jo maare to haañ samā.e

aisī jagah pe gar kahīñ rahne ko jā mile

insāñ ko zindagī meñ lahad kā mazā mile

bā.īs february kī sahar jab miyāñ huī

uTThe savere jaise hī zulmat nihāñ huī

asbāb bāñdh-būñdh ke hushiyār ho ga.e

gaaḌī bulā.ī chalne ko tayyār ho ga.e

pahuñchā har ik jahāz par jis tarah ho sakā

lekin kahīñ pe miltī na thī baiThne kī jā

asbāb chaar samt thā phailā paḌā huā

suntā na thā koī jo koī thā pukārtā

burqā meñ aurteñ thiiñ magar ġhair haal thā

relā vo thā qadam kā Thaharnā muhāl thā

kuchh khanD meñ bhare ga.e asbāb kī tarah

kuchh be qarār ho ga.e sīmāb kī tarah

ik jā pe kuchh samā jo ga.e aap kī tarah

kuchh ghūmte hī rah ga.e girdāb kī tarah

maujoñ kā uThnā aur vo talātum ki al-hazar

be-ḳhud hue ye sab ki na apnī rahī ḳhabar

qai se musāfiroñ kā bahut ġhair haal thā

chakkar vo thā ki sar kā uThānā muhāl thā

thiiñ jin ke saath aurteñ un kā na pūchho haal

le jaanā aur laanā thā ik jaan kā vabāl

sīḌhī se un ko le ke utarnā thā ik muhāl

be-pardagī kā dhyān na parde kā thā ḳhayāl

ye parda-dārī jaan ke uupar azaab thī

in auratoñ se mardoñ kī miTī ḳharāb thī

kahtī thī koī lo mirā burqā aTak gayā

hai hai nayā thā tiin jagah se masak gayā

sāhab sambhālo sar se dupaTTa khisak gayā

lo pā.incha ulajh gayā muqannā sarak gayā

lo biivī pān-dān kā Dhaknā bhī gir gayā

aafat paḌe jahāz pe kathā bhī gir gayā

tauba ye mere bachche kā baTva bhī gir gayā

pahuñchūñgī ab kī garche asal ḳhair se maiñ ghar

biivī amīThe kaan karūñgī na phir safar

vo kaun log haiñ ki jo aate haiñ baar baar

sach hai buā ki ghar hai ġhanīmat hazār baar

kuchh rail-ghar ka haal karun muKHtasar bayan

wo nau-baje ka waqt wo hangame ka saman

quliyon ka lad lad ke lana wo peTiyan

bajna wo ghanTiyon ka wo engine ki siTiyan

gaD-baD musafiron ki bhi ek yaadgar thi

aurat pe mard mard pe aurat sawar thi

al-qissa rail jab su-e-jhansi rawan hui

aur shakl lucknow ki nazar se nihan hui

jo third mein the un ke liye bhi aman hui

panjon pe dhakke kha ke jagah kuchh ayan hui

tha tisra pahar na ba-KHubi hui thi sham

chhuTa jo sath rail ka hum sab se wassalam

yani sawad-e-bambai us dam nazar paDa

Thahri train ek ek musafir utar paDa

kuchh bambai ka haal karun muKHtasar bayan

chauDi saDak do-ruya kai manzile makan

har-su milon ka shahr mein phaila hua dhuan

har ek male ke liye das bis siDhiyan

kamra har ek kaTh ka pinjra sila hua

har ek makin phandit ho jaise pala hua

baiThe uThe wahin pe wahin khana bhi pakae

munh hath dhoe chahe wahin baiTh kar nahae

sone ke waste na masahri agar bichhae

phailen na pair gunDli jo mare to han samae

aisi jagah pe gar kahin rahne ko ja mile

insan ko zindagi mein lahad ka maza mile

bais february ki sahar jab miyan hui

uTThe sawere jaise hi zulmat nihan hui

asbab bandh-bundh ke hushiyar ho gae

gaDi bulai chalne ko tayyar ho gae

pahuncha har ek jahaz par jis tarah ho saka

lekin kahin pe milti na thi baiThne ki ja

asbab chaar samt tha phaila paDa hua

sunta na tha koi jo koi tha pukarta

burqa mein aurten thin magar ghair haal tha

rela wo tha qadam ka Thaharna muhaal tha

kuchh khanD mein bhare gae asbab ki tarah

kuchh be qarar ho gae simab ki tarah

ek ja pe kuchh sama jo gae aap ki tarah

kuchh ghumte hi rah gae girdab ki tarah

maujon ka uThna aur wo talatum ki al-hazar

be-KHud hue ye sab ki na apni rahi KHabar

qai se musafiron ka bahut ghair haal tha

chakkar wo tha ki sar ka uThana muhaal tha

thin jin ke sath aurten un ka na puchho haal

le jaana aur lana tha ek jaan ka wabaal

siDhi se un ko le ke utarna tha ek muhaal

be-pardagi ka dhyan na parde ka tha KHayal

ye parda-dari jaan ke upar azab thi

in auraton se mardon ki miTi KHarab thi

kahti thi koi lo mera burqa aTak gaya

hai hai naya tha tin jagah se masak gaya

sahab sambhaalo sar se dupaTTa khisak gaya

lo paincha ulajh gaya muqanna sarak gaya

lo biwi pan-dan ka Dhakna bhi gir gaya

aafat paDe jahaz pe katha bhi gir gaya

tauba ye mere bachche ka baTwa bhi gir gaya

pahunchungi ab ki garche asal KHair se main ghar

biwi amiThe kan karungi na phir safar

wo kaun log hain ki jo aate hain bar bar

sach hai bua ki ghar hai ghanimat hazar bar