adu ki maut ka tumko agar malal hua

adū kī maut kā tum ko agar malāl huā

mujhe ḳhushī hai ki saale kā intiqāl huā

na is liye mujhe ġhurbat kā kuchh malāl huā

tumhāre husn kī daulat se mālā-māl huā

na duur dil se abhī tak tire malāl huā

adū kī maut ko hālāñki DeḌh saal huā

vo kaun hai ki na jis ko tirā ḳhayāl huā

har ik ḳhayāl kī zīnat tirā jamāl huā

kabhī na tum ko ġharīboñ kā kuchh ḳhayāl huā

usī ke ho ga.e jis kī girah meñ maal huā

na fā.eda hai na dushman kā intiqāl huā

paḌe hue use bistar pe ek saal huā

kiyā thā va.ada kabhī tum ne kal ke milne kā

tumhārī ek isī kal ko DeḌh saal huā

ḳhudā kī shaan hai bām-e-urūj par pahuñchā

vo dil jo aap kī Thokar se pā.emāl huā

tumhārā ghar nahīñ ḳhāsa ye mazbah-ḳhāna hai

jo bad-nasīb yahāñ aa gayā halāl huā

tumhārī teġh-e-adā se na bach sakā koī

jo aadhe zaḳhmī to ādhoñ kā intiqāl huā

vo māñgte haiñ usī din duā.eñ marne kī

marīz-e-ishq kā jis dam ḳharāb haal huā

paḌe haiñ saiñkaḌoñ teġh-e-nigāh ke zaḳhmī

ki achchhā ḳhāsā tirā ghar hī haspatāl huā

jahāñ bhī mil ga.e jabran lipaT gayā un ko

kabhī na raazī se puurā mirā savāl huā

ḳhudā ke vāste aa jaao ab to pahlū meñ

tumhāre hijr meñ jiinā mirā muhāl huā

usī ke ho ga.e ai 'būm' saiñkaḌoñ dushman

jahāñ meñ koī agar sāhib-e-kamāl huā

adu ki maut ka tum ko agar malal hua

mujhe KHushi hai ki sale ka intiqal hua

na is liye mujhe ghurbat ka kuchh malal hua

tumhaare husn ki daulat se mala-mal hua

na dur dil se abhi tak tere malal hua

adu ki maut ko haalanki DeDh sal hua

wo kaun hai ki na jis ko tera KHayal hua

har ek KHayal ki zinat tera jamal hua

kabhi na tum ko gharibon ka kuchh KHayal hua

usi ke ho gae jis ki girah mein mal hua

na faeda hai na dushman ka intiqal hua

paDe hue use bistar pe ek sal hua

kiya tha wada kabhi tum ne kal ke milne ka

tumhaari ek isi kal ko DeDh sal hua

KHuda ki shan hai baam-e-uruj par pahuncha

wo dil jo aap ki Thokar se paemal hua

tumhaara ghar nahin KHasa ye mazbah-KHana hai

jo bad-nasib yahan aa gaya halal hua

tumhaari tegh-e-ada se na bach saka koi

jo aadhe zaKHmi to aadhon ka intiqal hua

wo mangte hain usi din duaen marne ki

mariz-e-ishq ka jis dam KHarab haal hua

paDe hain sainkaDon tegh-e-nigah ke zaKHmi

ki achchha KHasa tera ghar hi haspatal hua

jahan bhi mil gae jabran lipaT gaya un ko

kabhi na raazi se pura mera sawal hua

KHuda ke waste aa jao ab to pahlu mein

tumhaare hijr mein jina mera muhaal hua

usi ke ho gae ai 'bum' sainkaDon dushman

jahan mein koi agar sahib-e-kamal hua