jine ka kuchh usul na marne ka Dhang hai

jiine kā kuchh usuul na marne kā Dhang hai

har chhoTī-chhoTī baat pe aapas meñ jang hai

jab se sunā hai film dī day after kā haal

khamboñ se ham ne bāñdh ke rakhā palang hai

T V pe gaay bhaiñs pukāreñge roz hī

urdu zabāñ se is meñ ziyāda tarang hai

aayā hai kaisā daur siyāsat meñ dosto

raa.ī bhī ḳhush nahīñ hai re.āyā bhī tang hai

aap apne haath ujaaḌ na leñ ye junūñ-parast

shīshe ke ghar meñ rahte hue mashq-e-sang hai

hūroñ pe hai nigāh go marqad meñ paañv haiñ

vaa.iz aḳhīr-e-umr meñ kyā terā Dhang hai

kursī pe jab the kuchh na kiyā aap ne magar

haT kar pukārnā to faqat uzr-e-lang hai

vaa.iz ko mai-kade meñ jo dekhā thā maiñ ne kal

uḌtā huā janāb ke chehre kā rang hai

tanz-o-mizāh meñ na chhuTā dāman-e-adab

sab se judā 'rahīm' tirā apnā rang hai

jine ka kuchh usul na marne ka Dhang hai

har chhoTi-chhoTi baat pe aapas mein jang hai

jab se suna hai film di day after ka haal

khambon se hum ne bandh ke rakha palang hai

T V pe gay bhains pukarenge roz hi

urdu zaban se is mein ziyaada tarang hai

aaya hai kaisa daur siyasat mein dosto

rai bhi KHush nahin hai reaya bhi tang hai

aap apne hath ujaD na len ye junun-parast

shishe ke ghar mein rahte hue mashq-e-sang hai

huron pe hai nigah go marqad mein panw hain

waiz aKHir-e-umr mein kya tera Dhang hai

kursi pe jab the kuchh na kiya aap ne magar

haT kar pukarna to faqat uzr-e-lang hai

waiz ko mai-kade mein jo dekha tha main ne kal

uDta hua janab ke chehre ka rang hai

tanz-o-mizah mein na chhuTa daman-e-adab

sab se juda 'rahim' tera apna rang hai