phanse kuchh aise hum aah-o-fughan ke dhoke mein

phañse kuchh aise ham āh-o-fuġhāñ ke dhoke meñ

dhuāñ sameT liyā āsmāñ ke dhoke meñ

ye kyā ḳhabar thī ki ḳhud kar rahe haiñ darbānī

lipaT gayā maiñ unhīñ pāsbāñ ke dhoke meñ

jo chhat kī tīliyāñ gal saḌ ke gir paḌeñ nīche

qafas pe barq girī āshiyāñ ke dhoke meñ

khuranD noch diye jab tamām zaḳhmoñ ke

rahe vo dil meñ mire gulsitāñ ke dhoke meñ

ye kis kā dar hai kuchh itnī ḳhabar nahīñ mujh ko

jhukāyā sar ko tire āstāñ ke dhoke meñ

shab-e-visāl meñ dāḌhī muñDā.ī kaam aa.ī

lipaT ga.e vo mujhe naujavāñ ke dhoke meñ

phañsī sarāb meñ mujh nā-murād kī kashtī

hai nāḳhudā abhī āb-e-ravāñ ke dhoke meñ

sunā.ī yaar ko sheroñ meñ ishq kī rūdād

vo aa ga.e mire tarz-e-bayāñ ke dhoke meñ

jo pūchhā ġhair ke ghar kyoñ ga.e to farmāyā

pahuñch ga.e vahāñ tere makāñ ke dhoke meñ

kiyā vo charb-zabānī se kaam qāsid ne

sunāyā haal mirā dāstāñ ke dhoke meñ

na hogā 'būm' sā duniyā meñ chūtiyā koī

bahār meñ bhī rahā ye ḳhizāñ ke dhoke meñ

phanse kuchh aise hum aah-o-fughan ke dhoke mein

dhuan sameT liya aasman ke dhoke mein

ye kya KHabar thi ki KHud kar rahe hain darbani

lipaT gaya main unhin pasban ke dhoke mein

jo chhat ki tiliyan gal saD ke gir paDen niche

qafas pe barq giri aashiyan ke dhoke mein

khuranD noch diye jab tamam zaKHmon ke

rahe wo dil mein mere gulsitan ke dhoke mein

ye kis ka dar hai kuchh itni KHabar nahin mujh ko

jhukaya sar ko tere aastan ke dhoke mein

shab-e-visal mein daDhi munDai kaam aai

lipaT gae wo mujhe naujawan ke dhoke mein

phansi sarab mein mujh na-murad ki kashti

hai naKHuda abhi aab-e-rawan ke dhoke mein

sunai yar ko sheron mein ishq ki rudad

wo aa gae mere tarz-e-bayan ke dhoke mein

jo puchha ghair ke ghar kyon gae to farmaya

pahunch gae wahan tere makan ke dhoke mein

kiya wo charb-zabani se kaam qasid ne

sunaya haal mera dastan ke dhoke mein

na hoga 'bum' sa duniya mein chutiya koi

bahaar mein bhi raha ye KHizan ke dhoke mein