tauba tauba se nadamat ki ghaDi aai hai

tauba tauba se nadāmat kī ghaḌī aa.ī hai

mai-kade par baḌī ghanghor ghaTā chhā.ī hai

rañg kuchh itnā mirī vahshat-e-dil laa.ī hai

majma-e-ām hai aur aap kā saudā.ī hai

ashk piitā huuñ to lo dete haiñ chhāle dil ke

aah kartā huuñ to phir ishq kī rusvā.ī hai

lau na dene lageñ jalte hue gul ke ruḳhsār

āriz-e-gul pe jo shabnam ne jagah paa.ī hai

maiñ tasavvur kī hadoñ se bhī guzar jā.ūñgā

mujh se milne meñ agar aap kī rusvā.ī hai

jab bhī uljhā hai sukūt-e-shab-e-ġham se mirā dil

terī yādoñ ne tabī.at mirī bahlā.ī hai

shaiḳh-sāhib kī nasīhat bharī bātoñ ke liye

kitnā rañgīn javāb aap kī añgḌā.ī hai

jab kabhī tark-e-mai-o-jām kā aayā hai ḳhayāl

mauj se phir tirī tasvīr ubhar aa.ī hai

apnī taqdīr pe be-sāḳhta aa.ī hai hañsī

jab bhī kashtī koī sāhil pe nazar aa.ī hai

kahkashāñ Daale hai chehre pe rūpahlā āñchal

chāñdnī paañv tale bichhne chalī aa.ī hai

kaun kahtā hai bulandī pe nahīñ huuñ 'sāgar'

merī me.arāj-e-mohabbat mirī rusvā.ī hai

tauba tauba se nadamat ki ghaDi aai hai

mai-kade par baDi ghanghor ghaTa chhai hai

rang kuchh itna meri wahshat-e-dil lai hai

majma-e-am hai aur aap ka saudai hai

ashk pita hun to lo dete hain chhaale dil ke

aah karta hun to phir ishq ki ruswai hai

lau na dene lagen jalte hue gul ke ruKHsar

aariz-e-gul pe jo shabnam ne jagah pai hai

main tasawwur ki hadon se bhi guzar jaunga

mujh se milne mein agar aap ki ruswai hai

jab bhi uljha hai sukut-e-shab-e-gham se mera dil

teri yaadon ne tabiat meri bahlai hai

shaiKH-sahib ki nasihat bhari baaton ke liye

kitna rangin jawab aap ki angDai hai

jab kabhi tark-e-mai-o-jam ka aaya hai KHayal

mauj se phir teri taswir ubhar aai hai

apni taqdir pe be-saKHta aai hai hansi

jab bhi kashti koi sahil pe nazar aai hai

kahkashan Dale hai chehre pe rupahla aanchal

chandni panw tale bichhne chali aai hai

kaun kahta hai bulandi pe nahin hun 'sagar'

meri mearaj-e-mohabbat meri ruswai hai