ustad mar gae

baiThā huā thā ghar meñ ki dastak kisī ne dī

dekhā lañgoT bāñdhe hue maut hai khaḌī

khole hue hai muñh ko kisī ġhaar kī tarah

bikhre hue haiñ baal shab-e-tār kī tarah

changul meñ haiñ phañse hue yārān-e-tez-rau

jeboñ se jhāñkte haiñ asīrān-e-nau-ba-nau

kapḌe ke thaan se baḌī hāthoñ meñ naan hai

dāñtoñ-tale dabī huī hāthī kī raan hai

dam phūltā hai dekh ke 'rustam' kā 'zāl' kā

oḌhe hue hai chādrā geñDe kī khaal kā

baġhloñ meñ haiñ dabe hue Dabbe jo rail ke

piipe dikhā.ī dete haiñ miTTī ke tel ke

yaksāñ amal hai maut kā rome o hijāz par

panjā dhare khaḌī hai havā.ī-jahāz par

ham bhī khaḌe haiñ sāmne majbūr kī tarah

tarbūz phāñktī hai vo añgūr kī tarah

ham ne kahā ki aa.iye tashrīf lā.iye

kyuuñ shā.eroñ ko maar rahī haiñ batā.iye

'ġhaurī' ga.e 'firāq' ga.e josh bhī ga.e

ḳhāmosh tere saath meñ 'ḳhāmosh' bhī ga.e

sāhir se jādū-gar ko bhī marhūm kar diyā

aur 'faiz' ko bhī faiz se mahrūm kar diyā

dīvār dhaḌ se gir ga.ī husn-e-ḳhayāl kī

qad-āvarī pasand na aa.ī 'hilāl' kī

'nāzir' kā kyā javāb thā tanz-o-mazāh meñ

us ko bhī tū ne le liyā apne nikāh meñ

kahne lagī ye maut ki kiije hameñ muaaf

allāh shā.eroñ ke hamesha se hai ḳhilāf

aadhe lahad meñ paañv haiñ aur shaġhl-e-mai-kashī

sattar baras ke san meñ bhī iz.hār-e-āshiqī

kahtā nahīñ hai koī bhī ash.ār-e-bāliġha

allāh ko pasand nahīñ hai mubālaġha

āshiq firāq-e-yār meñ rotā hai is qadar

arsh-e-barīñ pe chaḌhtā hai paanī kamar kamar

zulf-e-darāz jab khulī tanhā.ī baḌh ga.ī

tūl-e-shab-e-firāq se lambā.ī baḌh ga.ī

jo vaqt niiñd kā hai tum us meñ jagāte ho

be-vaj.h sāma.īn ko shab bhar satāte ho

ham ne kahā ki is liye un ko jagāte haiñ

ghar meñ rahe haiñ log to bachche banāte haiñ

kahne lagī ki saḳht haiñ māhaul ke liye

kaafī hamāre haath haiñ control ke liye

golā zamīñ kā maar duuñ fōtbāl kī tarah

jhāḌū nagar pe pher duuñ bhopal kī tarah

uTThe mirī nigāh to patthar meñ raah ho

funkār maar duuñ to zamāna tabāh ho

ham ne kahā ki shak hai hameñ terī zaat par

terā karam hai kis liye in shā.erāt par

duniyā tabāh karne meñ in ke bhī haath haiñ

ye bhī to shā.eroñ kī sharīk-e-hayāt haiñ

kyuuñ pā-e-shauq rahtā hai shā.er ke haath meñ

in meñ se ek bhī na ga.ī tere saath meñ

hañs kar diyā javāb ki un ko bhī ā.eñge

jis roz sher kahte hue un ko pā.eñge

un ke gunāh kyā kaheñ kis kis ke sar ga.e

tum ko ḳhabar nahīñ ka.ī ustād mar ga.e

baiTha hua tha ghar mein ki dastak kisi ne di

dekha langoT bandhe hue maut hai khaDi

khole hue hai munh ko kisi ghaar ki tarah

bikhre hue hain baal shab-e-tar ki tarah

changul mein hain phanse hue yaran-e-tez-rau

jebon se jhankte hain asiran-e-nau-ba-nau

kapDe ke than se baDi hathon mein nan hai

danton-tale dabi hui hathi ki ran hai

dam phulta hai dekh ke 'rustam' ka 'zal' ka

oDhe hue hai chadra genDe ki khaal ka

baghlon mein hain dabe hue Dabbe jo rail ke

pipe dikhai dete hain miTTi ke tel ke

yaksan amal hai maut ka rome o hijaz par

panja dhare khaDi hai hawai-jahaz par

hum bhi khaDe hain samne majbur ki tarah

tarbuz phankti hai wo angur ki tarah

hum ne kaha ki aaiye tashrif laiye

kyun shaeron ko mar rahi hain bataiye

'ghauri' gae 'firaq' gae josh bhi gae

KHamosh tere sath mein 'KHamosh' bhi gae

sahir se jadu-gar ko bhi marhum kar diya

aur 'faiz' ko bhi faiz se mahrum kar diya

diwar dhaD se gir gai husn-e-KHayal ki

qad-awari pasand na aai 'hilal' ki

'nazir' ka kya jawab tha tanz-o-mazah mein

us ko bhi tu ne le liya apne nikah mein

kahne lagi ye maut ki kije hamein muaf

allah shaeron ke hamesha se hai KHilaf

aadhe lahad mein panw hain aur shaghl-e-mai-kashi

sattar baras ke san mein bhi izhaar-e-ashiqi

kahta nahin hai koi bhi ashaar-e-baaligha

allah ko pasand nahin hai mubaalagha

aashiq firaq-e-yar mein rota hai is qadar

arsh-e-barin pe chaDhta hai pani kamar kamar

zulf-e-daraaz jab khuli tanhai baDh gai

tul-e-shab-e-firaq se lambai baDh gai

jo waqt nind ka hai tum us mein jagate ho

be-wajh samain ko shab bhar satate ho

hum ne kaha ki is liye un ko jagate hain

ghar mein rahe hain log to bachche banate hain

kahne lagi ki saKHt hain mahaul ke liye

kafi hamare hath hain control ke liye

gola zamin ka mar dun footbaal ki tarah

jhaDu nagar pe pher dun bhopal ki tarah

uTThe meri nigah to patthar mein rah ho

funkar mar dun to zamana tabah ho

hum ne kaha ki shak hai hamein teri zat par

tera karam hai kis liye in shaeraat par

duniya tabah karne mein in ke bhi hath hain

ye bhi to shaeron ki sharik-e-hayat hain

kyun pa-e-shauq rahta hai shaer ke hath mein

in mein se ek bhi na gai tere sath mein

hans kar diya jawab ki un ko bhi aaenge

jis roz sher kahte hue un ko paenge

un ke gunah kya kahen kis kis ke sar gae

tum ko KHabar nahin kai ustad mar gae