zamana aaya hai be-hijabi ka aam didar-e-yar hoga

zamāna aayā hai be-hijābī kā aam dīdār-e-yār hogā

bas aur kapḌā na sil sakegā jo tan pe hai tār-tār hogā

talāsh-e-gandum ko ghar se niklegā qāfila mor-e-nā-tavāñ kā

palaT ke aayā to sab ke pahlū meñ ik dil-e-dāġh-dār hogā

qasā.ī bakre kā gosht le kar sabhī himāla pe jā chaḌeñge

jo un kā pīchhā karegā ghis-pis ke ek musht ġhubār hogā

miThā.ī assī ruupe kī sair aur lāTrī bhī milā karegī

jo ahd halvā.iyoñ se bāñdhā gayā thā vo ustuvār hogā

chaḌhe gī qīmat vo jūtiyoñ kī na koī un tak pahuñch sakegī

barahna-pā.ī vahī rahegī magar nayā ḳhār-zār hogā

kafan kī qīmat suneñge murde to is ke sadme se jī uTheñge

janāza uTThegā ab kisī kā na ab kisī kā mazār hogā

na pūchho 'akbar' kā kuchh Thikāna abhī vahī kaifiyat hai us kī

yahīñ kahīñ chauk meñ khaḌā qīmatoñ kā shikva-guzār hogā

zamana aaya hai be-hijabi ka aam didar-e-yar hoga

bas aur kapDa na sil sakega jo tan pe hai tar-tar hoga

talash-e-gandum ko ghar se niklega qafila mor-e-na-tawan ka

palaT ke aaya to sab ke pahlu mein ek dil-e-dagh-dar hoga

qasai bakre ka gosht le kar sabhi himala pe ja chaDenge

jo un ka pichha karega ghis-pis ke ek musht ghubar hoga

miThai assi rupe ki sair aur laTri bhi mila karegi

jo ahd halwaiyon se bandha gaya tha wo ustuwar hoga

chaDhe gi qimat wo jutiyon ki na koi un tak pahunch sakegi

barahna-pai wahi rahegi magar naya KHar-zar hoga

kafan ki qimat sunenge murde to is ke sadme se ji uThenge

janaza uTThega ab kisi ka na ab kisi ka mazar hoga

na puchho 'akbar' ka kuchh Thikana abhi wahi kaifiyat hai us ki

yahin kahin chauk mein khaDa qimaton ka shikwa-guzar hoga