aankhon mein apni raat ko KHunab tha so tha

āñkhoñ meñ apnī raat ko ḳhūnāb thā so thā

jī dil ke iztirāb se betāb thā so thā

aa kar khaḌā huā thā ba-sad-husn-e-jalva-nāk

apnī nazar meñ vo dur-e-nāyāb thā so thā

sāvan hare na bhādoñ meñ ham sūkhe ahl-e-dard

sabza hamārī palkoñ kā sairāb thā so thā

darvesh kuchh ghaTā na baḌhā milk-e-shāh se

ḳhirqa kulāh paas jo asbāb thā so thā

kyā bhārī bhārī qāfile yaañ se chale ga.e

tujh ko vahī ḳhayāl-e-garāñ-ḳhvāb thā so thā

barsoñ se hai tilāvat-o-sajjāda-o-namāz

par mail-e-dil jo sū-e-mai-e-nāb thā so thā

ham ḳhushk-lab jo rote rahe juueñ bah chalīñ

par 'mīr' dasht ishq kā be-āb thā so thā

aankhon mein apni raat ko KHunab tha so tha

ji dil ke iztirab se betab tha so tha

aa kar khaDa hua tha ba-sad-husn-e-jalwa-nak

apni nazar mein wo dur-e-nayab tha so tha

sawan hare na bhadon mein hum sukhe ahl-e-dard

sabza hamari palkon ka sairab tha so tha

darwesh kuchh ghaTa na baDha milk-e-shah se

KHirqa kulah pas jo asbab tha so tha

kya bhaari bhaari qafile yan se chale gae

tujh ko wahi KHayal-e-garan-KHwab tha so tha

barson se hai tilawat-o-sajjada-o-namaz

par mail-e-dil jo su-e-mai-e-nab tha so tha

hum KHushk-lab jo rote rahe juen bah chalin

par 'mir' dasht ishq ka be-ab tha so tha