ab wo nahin ki shorish rahti thi aasman tak

ab vo nahīñ ki shorish rahtī thī āsmāñ tak

āshob-e-nāla ab to pahuñchā hai lā-makāñ tak

bah bhī gayā badan kā sab ho ke gosht paanī

ab kārad ai azīzāñ pahuñchī hai ustuḳhvāñ tak

tasvīr kī sī sham.eñ ḳhāmosh jalte haiñ ham

soz-e-darūñ hamārā aatā nahīñ zabāñ tak

rote phire haiñ lohū yak umr us galī meñ

bāġh-o-bahār hī hai jaave nazar jahāñ tak

āñkheñ jo rote rote jaatī rahīñ bajā hai

insāf kar ki koī dekhe sitam kahāñ tak

be-lutf tere kyūñkar tujh tak pahuñch sakeñ ham

haiñ sang raah apnī kitne yahāñ se vaañ tak

ham be-nasīb sar ko patthar se kyoñ na phoḌeñ

pahuñchā kabhū na jab.ha us sang-e-āstāñ tak

mānind-e-tair-e-nau-par uTThe jahāñ ga.e ham

dushvār hai hamārā aanā phir āshiyāñ tak

tan kaam meñ hamāre detā nahīñ vahī kuchh

hāzir haiñ 'mīr' ham to apnī taraf se jaañ tak

ab wo nahin ki shorish rahti thi aasman tak

aashob-e-nala ab to pahuncha hai la-makan tak

bah bhi gaya badan ka sab ho ke gosht pani

ab karad ai azizan pahunchi hai ustuKHwan tak

taswir ki si shamen KHamosh jalte hain hum

soz-e-darun hamara aata nahin zaban tak

rote phire hain lohu yak umr us gali mein

bagh-o-bahaar hi hai jawe nazar jahan tak

aankhen jo rote rote jati rahin baja hai

insaf kar ki koi dekhe sitam kahan tak

be-lutf tere kyunkar tujh tak pahunch saken hum

hain sang rah apni kitne yahan se wan tak

hum be-nasib sar ko patthar se kyon na phoDen

pahuncha kabhu na jabha us sang-e-astan tak

manind-e-tair-e-nau-par uTThe jahan gae hum

dushwar hai hamara aana phir aashiyan tak

tan kaam mein hamare deta nahin wahi kuchh

hazir hain 'mir' hum to apni taraf se jaan tak