ai charKH mat harif-e-andoh-e-be-kasan ho

ai charḳh mat harīf-e-andoh-e-be-kasāñ ho

kyā jaane muñh se nikle naale ke kyā samāñ ho

kab tak girah rahegā siine meñ dil ke mānind

ai ashk-e-shauq ik dam ruḳhsār par ravāñ ho

ham dūr-māndagāñ kī manzil-rasāñ magar ab

yā ho sadā jaras kī yā gard-e-kārvāñ ho

masnad-nashīn ho gar arsa hai tang us par

āsūda vo kisū kā jo ḳhāk-e-āstāñ ho

tā-chand kūcha-gardī jaise sabā zamīñ par

ai āh-e-sub.h-gāhī āshob-e-āsmāñ ho

gar zauq-e-sair hai to āvāra is chaman meñ

mānind-e-andalīb-e-gum-karda-āshiyāñ ho

ye jaan tū ki hai ik āvāra dast-bar-dil

ḳhāk-e-chaman ke uupar barg-e-ḳhizāñ jahāñ ho

kyā hai habāb saañ yaañ aa dekh apnī āñkhoñ

gar pairahan meñ mere merā tujhe gumāñ ho

az-ḳhvesh-rafta har dam rahte haiñ ham jo us bin

kahte haiñ log aksar us vaqt tum kahāñ ho

patthar se toḌ Dālūñ ā.īne ko abhī maiñ

gar rū-e-ḳhūbsūrat terā na darmiyāñ ho

us teġh-zan se kahiyo qāsid mirī taraf se

ab tak bhī nīm-jāñ huuñ gar qasd-e-imtihāñ ho

kal but-kade meñ ham ne dhauleñ lagā.iyāñ haiñ

ka.abe meñ aaj zāhid go ham pe sargirāñ ho

ham-sāya is chaman ke kitne shikasta-par haiñ

itne liye ki shāyad ik baav gul-fishāñ ho

'mīr' us ko jaan kar tū be-shub.h miliyo rah par

sahrā meñ jo namad-mū baiThā koī javāñ ho

ai charKH mat harif-e-andoh-e-be-kasan ho

kya jaane munh se nikle nale ke kya saman ho

kab tak girah rahega sine mein dil ke manind

ai ashk-e-shauq ek dam ruKHsar par rawan ho

hum dur-mandagan ki manzil-rasan magar ab

ya ho sada jaras ki ya gard-e-karwan ho

masnad-nashin ho gar arsa hai tang us par

aasuda wo kisu ka jo KHak-e-astan ho

ta-chand kucha-gardi jaise saba zamin par

ai aah-e-subh-gahi aashob-e-asman ho

gar zauq-e-sair hai to aawara is chaman mein

manind-e-andalib-e-gum-karda-ashiyan ho

ye jaan tu ki hai ek aawara dast-bar-dil

KHak-e-chaman ke upar barg-e-KHizan jahan ho

kya hai habab san yan aa dekh apni aankhon

gar pairahan mein mere mera tujhe guman ho

az-KHwesh-rafta har dam rahte hain hum jo us bin

kahte hain log aksar us waqt tum kahan ho

patthar se toD Dalun aaine ko abhi main

gar ru-e-KHubsurat tera na darmiyan ho

us tegh-zan se kahiyo qasid meri taraf se

ab tak bhi nim-jaan hun gar qasd-e-imtihan ho

kal but-kade mein hum ne dhaulen lagaiyan hain

kabe mein aaj zahid go hum pe sargiran ho

ham-saya is chaman ke kitne shikasta-par hain

itne liye ki shayad ek baw gul-fishan ho

'mir' us ko jaan kar tu be-shubh miliyo rah par

sahra mein jo namad-mu baiTha koi jawan ho