ajab sohbat hai kyunkar subh apni sham kariye ab

ajab sohbat hai kyūñkar sub.h apnī shaam kariye ab

jahāñ Tuk aan baiThe ham kahā ārām kariye ab

hazāroñ ḳhvāhish-e-murda ne sar dil se nikālā hai

qayāmat jī pe hai dīdār ko Tuk aam kariye ab

balā āshob thā go jaan par āġhāz-e-ulfat meñ

huā so to huā andesha-e-anjām kariye ab

bahut kī yā-sanam-goī hue mash.hūr kāfir ham

vazīfa koī din apnā ḳhudā kā naam kariye ab

zabāñ-ḳhāma ke hilte hī hazāroñ ashk girte haiñ

haqīqat apne dil kī aah kyā arqām kariye ab

kahāñ tak kām-nākām us jafā-jū ke liye mariye

agar talvār haath aave to apnā kaam kariye ab

fasāna shāḳh-dar-shāḳh us nihāl-e-husn ke ġham kā

kahāñ ai 'mīr' be-barg-o-navā itmām kariye ab

ajab sohbat hai kyunkar subh apni sham kariye ab

jahan Tuk aan baiThe hum kaha aaram kariye ab

hazaron KHwahish-e-murda ne sar dil se nikala hai

qayamat ji pe hai didar ko Tuk aam kariye ab

bala aashob tha go jaan par aaghaz-e-ulfat mein

hua so to hua andesha-e-anjam kariye ab

bahut ki ya-sanam-goi hue mashhur kafir hum

wazifa koi din apna KHuda ka nam kariye ab

zaban-KHama ke hilte hi hazaron ashk girte hain

haqiqat apne dil ki aah kya arqam kariye ab

kahan tak kaam-nakaam us jafa-ju ke liye mariye

agar talwar hath aawe to apna kaam kariye ab

fasana shaKH-dar-shaKH us nihaal-e-husn ke gham ka

kahan ai 'mir' be-barg-o-nawa itmam kariye ab