burqa mein kya chhupen we howen jinhon ki ye tab

burqā meñ kyā chhupeñ ve hoveñ jinhoñ kī ye taab

ruḳhsār tere pyāre haiñ āftāb mahtāb

aTkal hamīñ ko un ne āḳhir hadaf banāyā

har-chand ham balā-kash the ek tīr-e-pur-tāb

kuchh qadr maiñ na jaanī ġhaflat se raftagāñ kī

āñkheñ sī khul ga.iiñ ab jab sohbateñ huiiñ ḳhvāb

an-ban hī ke sabab haiñ us lālchī se saare

yaañ hai faqīrī-e-mahz vaañ chāhiye hai asbāb

us bahr-e-husn ke tiiñ dekhā hai aap meñ kyā

jaatā hai sadqe apne jo lahza lahza girdāb

achraj hai ye ki mutlaq koī nahīñ hai ḳhvāhāñ

jins-e-vafā agarche haigī bahut hī kamyāb

thī chashm ye rukegā palkoñ se girya lekin

hotī hai band koī tinkoñ se rāh-e-sailāb

qaaf

tū bhī to muḳhtalat ho sabze meñ ham se saaqī

le kar baġhal meñ zālim mīnā-e-bāda-e-nāb

niklī haiñ ab ke kaliyāñ is rang se chaman meñ

sar joḌ joḌ jaise mil baiThte haiñ ahbāb

kyā lāl-e-lab kisū ke ai 'mīr' chit chaḌhe haiñ

chehre pe tere har dam bahtā rahe hai ḳhūnāb

burqa mein kya chhupen we howen jinhon ki ye tab

ruKHsar tere pyare hain aaftab mahtab

aTkal hamin ko un ne aaKHir hadaf banaya

har-chand hum bala-kash the ek tir-e-pur-tab

kuchh qadr main na jaani ghaflat se raftagan ki

aankhen si khul gain ab jab sohbaten huin KHwab

an-ban hi ke sabab hain us lalchi se sare

yan hai faqiri-e-mahz wan chahiye hai asbab

us bahr-e-husn ke tin dekha hai aap mein kya

jata hai sadqe apne jo lahza lahza girdab

achraj hai ye ki mutlaq koi nahin hai KHwahan

jins-e-wafa agarche haigi bahut hi kamyab

thi chashm ye rukega palkon se girya lekin

hoti hai band koi tinkon se rah-e-sailab

qaf

tu bhi to muKHtalat ho sabze mein hum se saqi

le kar baghal mein zalim mina-e-baada-e-nab

nikli hain ab ke kaliyan is rang se chaman mein

sar joD joD jaise mil baiThte hain ahbab

kya lal-e-lab kisu ke ai 'mir' chit chaDhe hain

chehre pe tere har dam bahta rahe hai KHunab