برقع میں کیا چھپیں وے ہوویں جنہوں کی یہ تاب

برقع میں کیا چھپیں وے ہوویں جنہوں کی یہ تاب

رخسار تیرے پیارے ہیں آفتاب مہتاب

اٹکل ہمیں کو ان نے آخر ہدف بنایا

ہرچند ہم بلاکش تھے ایک تیر پر تاب

کچھ قدر میں نہ جانی غفلت سے رفتگاں کی

آنکھیں سی کھل گئیں اب جب صحبتیں ہوئیں خواب

ان بن ہی کے سبب ہیں اس لالچی سے سارے

یاں ہے فقیرئ محض واں چاہیے ہے اسباب

اس بحر حسن کے تیں دیکھا ہے آپ میں کیا

جاتا ہے صدقے اپنے جو لحظہ لحظہ گرداب

اچرج ہے یہ کہ مطلق کوئی نہیں ہے خواہاں

جنس وفا اگرچہ ہے گی بہت ہی کم یاب

تھی چشم یہ رکے گا پلکوں سے گریہ لیکن

ہوتی ہے بند کوئی تنکوں سے راہ سیلاب

ق

تو بھی تو مختلط ہو سبزے میں ہم سے ساقی

لے کر بغل میں ظالم مینائے بادۂ ناب

نکلی ہیں اب کے کلیاں اس رنگ سے چمن میں

سر جوڑ جوڑ جیسے مل بیٹھتے ہیں احباب

کیا لعل لب کسو کے اے میرؔ چت چڑھے ہیں

چہرے پہ تیرے ہر دم بہتا رہے ہے خوناب