darweshon se to un ne zidden nikaliyan hain

darveshoñ se to un ne ziddeñ nikāliyāñ haiñ

īdhar se haiñ duā.eñ ūdhar se gāliyāñ haiñ

jab.he se siina tak haiñ kyā kyā ḳharāsh-e-nāḳhun

goyā ki ham ne muñh par talvāreñ khā liyāñ haiñ

jab lag ga.e jhamakne ruḳhsār-e-yār donoñ

tab mehr-o-mah ne apnī āñkheñ chhupā liyāñ haiñ

sub.h-e-chaman kā jalva hindī butoñ meñ dekhā

sandal bharī jabīñ haiñ hoñToñ kī lāliyāñ haiñ

dard-o-alam hī meñ sab jaate haiñ roz-o-shab yaañ

din ashk-reziyāñ haiñ shab zār-nāliyāñ haiñ

hezoñ ne reḳhte ko vuuñ reḳhtī banāyā

juuñ in dinoñ meñ baale laḌkoñ kī bāliyāñ haiñ

ijmā-e-bul-havas ko rakh rakh liyā hai aage

mat jaan aisī bhīḌeñ jī dene vāliyāñ haiñ

un gul-ruḳhoñ kī qāmat lahke hai yuuñ havā meñ

jis rang se lachaktī phūloñ kī Dāliyāñ haiñ

vo duzd-e-dil nahīñ to kyoñ dekhte hī mujh ko

palkeñ jhukā liyāñ haiñ āñkheñ churā liyāñ haiñ

us āftāb bin yaañ andher ho rahā hai

din bhī siyāh apne juuñ rāteñ kāliyāñ haiñ

chalte haiñ ye to Thokar lagtī hai 'mīr' dil ko

chāleñ hī dilbaroñ kī sab se nirāliyāñ haiñ

darweshon se to un ne zidden nikaliyan hain

idhar se hain duaen udhar se galiyan hain

jabhe se sina tak hain kya kya KHarash-e-naKHun

goya ki hum ne munh par talwaren kha liyan hain

jab lag gae jhamakne ruKHsar-e-yar donon

tab mehr-o-mah ne apni aankhen chhupa liyan hain

subh-e-chaman ka jalwa hindi buton mein dekha

sandal bhari jabin hain honTon ki laliyan hain

dard-o-alam hi mein sab jate hain roz-o-shab yan

din ashk-reziyan hain shab zar-naliyan hain

hezon ne reKHte ko wun reKHti banaya

jun in dinon mein baale laDkon ki baaliyan hain

ijma-e-bul-hawas ko rakh rakh liya hai aage

mat jaan aisi bhiDen ji dene waliyan hain

un gul-ruKHon ki qamat lahke hai yun hawa mein

jis rang se lachakti phulon ki Daliyan hain

wo duzd-e-dil nahin to kyon dekhte hi mujh ko

palken jhuka liyan hain aankhen chura liyan hain

us aaftab bin yan andher ho raha hai

din bhi siyah apne jun raaten kaliyan hain

chalte hain ye to Thokar lagti hai 'mir' dil ko

chaalen hi dilbaron ki sab se niraliyan hain