دیکھیں تو تیری کب تک یہ کج ادائیاں ہیں

دیکھیں تو تیری کب تک یہ کج ادائیاں ہیں

اب ہم نے بھی کسو سے آنکھیں لڑائیاں ہیں

ٹک سن کہ سو برس کی ناموس خامشی کھو

دو چار دل کی باتیں اب منہ پر آئیاں ہیں

ہم وے ہیں خوں گرفتہ ظالم جنہوں نے تیری

ابرو کی جنبش اوپر تلواریں کھائیاں ہیں

آئینہ ہو کہ صورت معنی سے ہے لبالب

راز نہان حق میں کیا خود نمائیاں ہیں

کیا چہرہ تجھ سے ہوگا اے آفتاب طلعت

منہ چاند کا جو ہم نے دیکھا تو جھائیاں ہیں

کعبے میں میرؔ ہم پر یا سرگراں ہے زاہد

یا بت کدہ میں ہم نے دھولیں لگائیاں ہیں