dekhen to teri kab tak ye kaj-adaiyan hain

dekheñ to terī kab tak ye kaj-adā.iyāñ haiñ

ab ham ne bhī kisū se āñkheñ laḌā.iyāñ haiñ

Tuk sun ki sau baras kī nāmūs-e-ḳhāmushī kho

do chaar dil kī bāteñ ab muñh par ā.iyāñ haiñ

ham ve haiñ ḳhūñ-girafta zālim jinhoñ ne terī

abrū kī jumbish uupar talvāreñ khā.iyāñ haiñ

ā.īna ho ki sūrat ma.anī se hai labālab

rāz-e-nihān-e-haq meñ kyā ḳhud numā.iyāñ haiñ

kyā chehra tujh se hogā ai āftāb-e-tal.at

muñh chāñd kā jo ham ne dekhā to jhā.iyāñ haiñ

ka.abe meñ 'mīr' ham par yā sargirāñ hai zāhid

yā but-kade meñ ham ne dhauleñ lagā.iyāñ haiñ

dekhen to teri kab tak ye kaj-adaiyan hain

ab hum ne bhi kisu se aankhen laDaiyan hain

Tuk sun ki sau baras ki namus-e-KHamushi kho

do chaar dil ki baaten ab munh par aaiyan hain

hum we hain KHun-girafta zalim jinhon ne teri

abru ki jumbish upar talwaren khaiyan hain

aaina ho ki surat mani se hai labaalab

raaz-e-nihan-e-haq mein kya KHud numaiyan hain

kya chehra tujh se hoga ai aaftab-e-talat

munh chand ka jo hum ne dekha to jhaiyan hain

kabe mein 'mir' hum par ya sargiran hai zahid

ya but-kade mein hum ne dhaulen lagaiyan hain