diwangi ki hai wahi zor-awari hanuz

dīvāngī kī hai vahī zor-āvarī hanūz

har dam na.ī hai merī garebāñ-darī hanūz

sar se gayā hai sāya-e-lutf us kā der se

āñkhoñ hī meñ phire hai mirī vo parī hanūz

shoḳhī se zār-e-girya kī ḳhuuñ chashm meñ nahīñ

vaisī hī hai mizha kī ba-ainih tirī hanūz

kab se nigāh gaaḌe hai yaañ roz āftāb

ham dekhe haiñ jahāñ ke ta.iiñ sarsarī hanūz

mab.hūt ho gayā hai jahāñ ik nazar kiye

jaatī nahīñ in āñkhoñ se jādūgarī hanūz

abr-e-karam ne sa.ī bahut kī pe kyā husūl

hotī nahīñ hamārī zarā.at harī hanūz

muddat se 'mīr' be-dil-o-dīñ dilbaroñ meñ hai

kartā nahīñ hai us kī koī dilbarī hanūz

diwangi ki hai wahi zor-awari hanuz

har dam nai hai meri gareban-dari hanuz

sar se gaya hai saya-e-lutf us ka der se

aankhon hi mein phire hai meri wo pari hanuz

shoKHi se zar-e-girya ki KHun chashm mein nahin

waisi hi hai mizha ki ba-ainih teri hanuz

kab se nigah gaDe hai yan roz aaftab

hum dekhe hain jahan ke tain sarsari hanuz

mabhut ho gaya hai jahan ek nazar kiye

jati nahin in aankhon se jadugari hanuz

abr-e-karam ne sai bahut ki pe kya husul

hoti nahin hamari zaraat hari hanuz

muddat se 'mir' be-dil-o-din dilbaron mein hai

karta nahin hai us ki koi dilbari hanuz