gul-barg se hain nazuk KHubi-e-pa to dekho

gul-barg se haiñ nāzuk ḳhūbī-e-pā to dekho

kyā hai jhamak kafak kī rang-e-hinā to dekho

har baat par ḳhushūnat tarz-e-jafā to dekho

har lamha be-adā.ī us kī adā to dekho

saa.e meñ har palak ke ḳhvābīda hai qayāmat

us fitna-e-zamāñ ko koī jagā to dekho

bulbul bhī gul ga.e par mar kar chaman se niklī

is murġh-e-shauq-kash kī Tuk tum vafā to dekho

tanzeñ abas karo ho ġhash rahne par hamāre

do-chār din kisū se dil ko lagā to dekho

honā paḌe hai dushman har gaam apnī jaañ kā

kūche meñ dostī ke har koī aa to dekho

piirī meñ mol le hai mun.im haveliyoñ ko

Dhahtā phire hai aaphī us par binā to dekho

Duubī hai kashtī merī bahr-e-amīq-e-ġham meñ

begāne se khaḌe ho tum āshnā to dekho

aa.e jo ham to un ne āñkhoñ meñ ham ko rakkhā

ahl-e-havas se koī ūdhar ko jā to dekho

hai is chaman meñ vo gul sad-rang mahv-e-jalvā

dekho jahāñ vahī hai kuchh us sivā to dekho

ash.ār-e-'mīr' par hai ab hā.e-vā.e har-sū

kuchh sehr to nahīñ hai lekin havā to dekho

gul-barg se hain nazuk KHubi-e-pa to dekho

kya hai jhamak kafak ki rang-e-hina to dekho

har baat par KHushunat tarz-e-jafa to dekho

har lamha be-adai us ki ada to dekho

sae mein har palak ke KHwabida hai qayamat

us fitna-e-zaman ko koi jaga to dekho

bulbul bhi gul gae par mar kar chaman se nikli

is murgh-e-shauq-kash ki Tuk tum wafa to dekho

tanzen abas karo ho ghash rahne par hamare

do-chaar din kisu se dil ko laga to dekho

hona paDe hai dushman har gam apni jaan ka

kuche mein dosti ke har koi aa to dekho

piri mein mol le hai munim haweliyon ko

Dhahta phire hai aaphi us par bina to dekho

Dubi hai kashti meri bahr-e-amiq-e-gham mein

begane se khaDe ho tum aashna to dekho

aae jo hum to un ne aankhon mein hum ko rakkha

ahl-e-hawas se koi udhar ko ja to dekho

hai is chaman mein wo gul sad-rang mahw-e-jalwa

dekho jahan wahi hai kuchh us siwa to dekho

ashaar-e-'mir' par hai ab hae-wae har-su

kuchh sehr to nahin hai lekin hawa to dekho