gul-barg si zaban se bulbul ne kya fughan ki

gul-barg sī zabāñ se bulbul ne kyā fuġhāñ kī

sab jaise uḌ ga.ī hai rangīnī gulsitāñ kī

matlūb gum kiyā hai tab aur bhī phire hai

be-vajah kuchh nahīñ hai gardish ye āsmāñ kī

maa.il sitam ke honā jaur-o-jafā bhī karnā

insāf se ye kahnā ye rasm hai kahāñ kī

hai sabza-e-lab-e-jū is lutf se chaman meñ

juuñ bhīgtī maseñ hoñ koī sarv-e-naujavāñ kī

maiñ ghar jahāñ meñ apne laḌkoñ ke se banā.e

jab chāhā tab miTāyā buniyād kyā jahāñ kī

saum-o-salāt yaksū maiḳhāne meñ jo the ham

āvāz bhī na aa.ī kānoñ meñ yaañ azaañ kī

jab sāmne ga.e ham ham ne use duā dī

shakl un ne dekhte hī ġhussa kiyā zabāñ kī

dekheñ to 'mīr' kyūñkar hijrāñ meñ ham jiye haiñ

hai iztirāb dil kā be-tāqatī hai jaañ kī

gul-barg si zaban se bulbul ne kya fughan ki

sab jaise uD gai hai rangini gulsitan ki

matlub gum kiya hai tab aur bhi phire hai

be-wajah kuchh nahin hai gardish ye aasman ki

mail sitam ke hona jaur-o-jafa bhi karna

insaf se ye kahna ye rasm hai kahan ki

hai sabza-e-lab-e-ju is lutf se chaman mein

jun bhigti masen hon koi sarw-e-naujawan ki

main ghar jahan mein apne laDkon ke se banae

jab chaha tab miTaya buniyaad kya jahan ki

saum-o-salat yaksu maiKHane mein jo the hum

aawaz bhi na aai kanon mein yan azan ki

jab samne gae hum hum ne use dua di

shakl un ne dekhte hi ghussa kiya zaban ki

dekhen to 'mir' kyunkar hijran mein hum jiye hain

hai iztirab dil ka be-taqati hai jaan ki