gul ne bahut kaha ki chaman se na jaiye

gul ne bahut kahā ki chaman se na jā.iye

gul-gasht ko jo aa.iye āñkhoñ pe ā.īye

maiñ be-dimāġh kar ke taġhāful chalā gayā

vo dil kahāñ ki naaz kisū ke uThā.iye

sohbat ajab tarah kī paḌī ittifāq haa.e

kho baiThiye jo aap ko to us ko pā.iye

ranjīdagī hamārī to par sahl hai vale

āzurda dil kisū ko na itnā satā.iye

ḳhātir hī ke ilāqe kī sab haiñ ḳharābiyāñ

apnā ho bas to dil na kisū se lagā.iye

ai hamdam ibtidā se hai ādam-kushī meñ ishq

tab-e-sharīf apnī na īdhar ko lā.iye

itnī bhī kyā hai dīda-darā.ī ki ġhair se

āñkheñ laḌā.iye hameñ āñkheñ dikhā.iye

machlā hai vo to dekh ke letā hai āñkheñ muuñd

sotā paḌā ho koī to us ko jagā.iye

jān-e-ġhayūr par hai sitam sā sitam ki 'mīr'

bigḌā jinhoñ se chāhiye un se banā.iye

gul ne bahut kaha ki chaman se na jaiye

gul-gasht ko jo aaiye aankhon pe aaiye

main be-dimagh kar ke taghaful chala gaya

wo dil kahan ki naz kisu ke uThaiye

sohbat ajab tarah ki paDi ittifaq hae

kho baiThiye jo aap ko to us ko paiye

ranjidagi hamari to par sahl hai wale

aazurda dil kisu ko na itna sataiye

KHatir hi ke ilaqe ki sab hain KHarabiyan

apna ho bas to dil na kisu se lagaiye

ai hamdam ibtida se hai aadam-kushi mein ishq

tab-e-sharif apni na idhar ko laiye

itni bhi kya hai dida-darai ki ghair se

aankhen laDaiye hamein aankhen dikhaiye

machla hai wo to dekh ke leta hai aankhen mund

sota paDa ho koi to us ko jagaiye

jaan-e-ghayur par hai sitam sa sitam ki 'mir'

bigDa jinhon se chahiye un se banaiye