haal-e-dil mir ka ai ahl-e-wafa mat puchho

hāl-e-dil 'mīr' kā ai ahl-e-vafā mat pūchho

us sitam-kushta pe jo guzrī jafā mat pūchho

sub.h se aur bhī paatā huuñ use shaam ko tund

kaam kartī hai jo kuchh merī duā mat pūchho

ustuḳhvāñ toḌe mire us kī galī ke sag ne

jis ḳharābī se maiñ vaañ raat rahā mat pūchho

hosh-o-sabr-o-ḳhirad-o-dīn-o-havās-o-dil-o-tāb

us ke ek aane meñ kyā kyā na gayā mat pūchho

ishti'ālak kī mohabbat ne ki dar-bast phuñkā

shahr-e-dil kyā kahūñ kis taur jalā mat pūchho

vaqt-e-qatl ārzū-e-dil jo lage pūchhne log

maiñ ishārat kī udhar un ne kahā mat pūchho

ḳhvāh maarā unhīñ ne 'mīr' ko ḳhvāh aap muā

jaane do yaaro jo honā thā huā mat pūchho

haal-e-dil 'mir' ka ai ahl-e-wafa mat puchho

us sitam-kushta pe jo guzri jafa mat puchho

subh se aur bhi pata hun use sham ko tund

kaam karti hai jo kuchh meri dua mat puchho

ustuKHwan toDe mere us ki gali ke sag ne

jis KHarabi se main wan raat raha mat puchho

hosh-o-sabr-o-KHirad-o-din-o-hawas-o-dil-o-tab

us ke ek aane mein kya kya na gaya mat puchho

ishti'alak ki mohabbat ne ki dar-bast phunka

shahr-e-dil kya kahun kis taur jala mat puchho

waqt-e-qatl aarzu-e-dil jo lage puchhne log

main ishaarat ki udhar un ne kaha mat puchho

KHwah mara unhin ne 'mir' ko KHwah aap mua

jaane do yaro jo hona tha hua mat puchho