hai harf-e-KHama dil-zada husn-e-qubul ka

hai harf-e-ḳhāma dil-zada husn-e-qubūl kā

yā'nī ḳhayāl sar meñ hai nā't-e-rasūl kā

rah pairvī meñ us kī ki gām-e-nuḳhust meñ

zāhir asar hai maqsad-e-dil ke vasūl kā

vo muqtadā-e-ḳhalq-e-jahāñ ab nahīñ huā

pahle hī thā imaam nufūs-o-'uqūl kā

surma kiyā hai vaz' pa.e-chashm-e-ahl-e-quds

ahmad ke rahguzār kī ḳhaak aur dhuul kā

hai muttahid nabī-o-'alī-o-vasī kī zaat

yaañ harf mo'tabar nahīñ har bul-fuzūl kā

dho muñh hazār paanī se sau baar paḌh darūd

tab naam le tū us chamanistāñ ke phuul kā

hāsil hai 'mīr' dostī-e-ahl-e-bait agar

to ġham hai kyā najāt ke apnī husūl kā

hai harf-e-KHama dil-zada husn-e-qubul ka

ya'ni KHayal sar mein hai na't-e-rasul ka

rah pairwi mein us ki ki gam-e-nuKHust mein

zahir asar hai maqsad-e-dil ke wasul ka

wo muqtada-e-KHalq-e-jahan ab nahin hua

pahle hi tha imam nufus-o-'uqul ka

surma kiya hai waz' pae-chashm-e-ahl-e-quds

ahmad ke rahguzar ki KHak aur dhul ka

hai muttahid nabi-o-'ali-o-wasi ki zat

yan harf mo'tabar nahin har bul-fuzul ka

dho munh hazar pani se sau bar paDh darud

tab nam le tu us chamanistan ke phul ka

hasil hai 'mir' dosti-e-ahl-e-bait agar

to gham hai kya najat ke apni husul ka