hai KHak jaise reg-e-rawan sab na aab hai

hai ḳhaak jaise reg-e-ravāñ sab na aab hai

daryā-e-mauj-ḳhez jahāñ kā sarāb hai

roz-e-shumār meñ bhī muhāsib hai gar koī

to be-hisāb kuchh na kar āḳhir hisāb hai

is shahr-e-dil ko tū bhī jo dekhe to ab kahe

kyā jāniye ki bastī ye kab kī ḳharāb hai

muñh par liye naqāb tū ai maah kyā chhupe

āshob-e-shahr-e-husn tirā āftāb hai

kis rashk-e-gul kī baaġh meñ zulf-e-siyah khulī

mauj-e-havā meñ aaj nipaT pech-o-tāb hai

kyā dil mujhe bahisht meñ le jā.egā bhalā

jis ke sabab ye jaan pe merī azaab hai

sun kaan khol kar ki tanik jald aañkh khol

ġhāfil ye zindagānī fasāna hai ḳhvāb hai

rah āshnā-e-lutf haqīqat ke bahr kā

hai rashk-e-zulf-o-chashm jo mauj-e-habāb hai

ātish hai soz-e-sīnā hamārā magar ki 'mīr'

naame se āshiqoñ ke kabūtar kabāb hai

hai KHak jaise reg-e-rawan sab na aab hai

darya-e-mauj-KHez jahan ka sarab hai

roz-e-shumar mein bhi muhasib hai gar koi

to be-hisab kuchh na kar aaKHir hisab hai

is shahr-e-dil ko tu bhi jo dekhe to ab kahe

kya jaaniye ki basti ye kab ki KHarab hai

munh par liye naqab tu ai mah kya chhupe

aashob-e-shahr-e-husn tera aaftab hai

kis rashk-e-gul ki bagh mein zulf-e-siyah khuli

mauj-e-hawa mein aaj nipaT pech-o-tab hai

kya dil mujhe bahisht mein le jaega bhala

jis ke sabab ye jaan pe meri azab hai

sun kan khol kar ki tanik jald aankh khol

ghafil ye zindagani fasana hai KHwab hai

rah aashna-e-lutf haqiqat ke bahr ka

hai rashk-e-zulf-o-chashm jo mauj-e-habab hai

aatish hai soz-e-sina hamara magar ki 'mir'

name se aashiqon ke kabutar kabab hai