ہم رو رو کے درد دل دیوانہ کہیں گے

ہم رو رو کے درد دل دیوانہ کہیں گے

جی میں ہے کہوں حال غریبانہ کہیں گے

سودائی و رسوا و شکستہ دل و خستہ

اب لوگ ہمیں عشق میں کیا کیا نہ کہیں گے

دیکھے سو کہے کوئی نہیں جرم کسو کا

کہتے ہیں بجا لوگ بھی بے جا نہ کہیں گے

ہوں در بدر و خاک بسر چاک گریباں

اس طور سے کیونکر مجھے رسوا نہ کہیں گے

ویرانے کو مدت کے کوئی کیا کرے تعمیر

اجڑی ہوئی آبادی کو ویرانہ کہیں گے

میں رویا کڑھا کرتا ہوں دن رات جو درویش

من بعد مرے تکیے کو غم خانہ کہیں گے

موقوف غم میرؔ کہ شب ہو چکی ہمدم

کل رات کو پھر باقی یہ افسانہ کہیں گے