hum ro ro ke dard-e-dil-e-diwana kahenge

ham ro ro ke dard-e-dil-e-dīvāna kaheñge

jī meñ hai kahūñ hāl-e-ġharībāna kaheñge

saudā.ī-o-rusvā-o-shikasta-dil-o-ḳhasta

ab log hameñ ishq meñ kyā kyā na kaheñge

dekhe so kahe koī nahīñ jurm kisū kā

kahte haiñ bajā log bhī bejā na kaheñge

huuñ dar-ba-dar-o-ḳhāk-basar chāk-garebāñ

is taur se kyūñkar mujhe rusvā na kaheñge

vīrāne ko muddat ke koī kyā kare ta.amīr

ujḌī huī ābādī ko vīrāna kaheñge

maiñ royā kuḌhā kartā huuñ din-rāt jo darvesh

min-bād mire takiye ko ġham-ḳhāna kaheñge

mauqūf ġham-e-'mīr' ki shab ho chukī hamdam

kal raat ko phir baaqī ye afsāna kaheñge

hum ro ro ke dard-e-dil-e-diwana kahenge

ji mein hai kahun haal-e-gharibana kahenge

saudai-o-ruswa-o-shikasta-dil-o-KHasta

ab log hamein ishq mein kya kya na kahenge

dekhe so kahe koi nahin jurm kisu ka

kahte hain baja log bhi beja na kahenge

hun dar-ba-dar-o-KHak-basar chaak-gareban

is taur se kyunkar mujhe ruswa na kahenge

virane ko muddat ke koi kya kare tamir

ujDi hui aabaadi ko virana kahenge

main roya kuDha karta hun din-raat jo darwesh

min-baad mere takiye ko gham-KHana kahenge

mauquf gham-e-'mir' ki shab ho chuki hamdam

kal raat ko phir baqi ye afsana kahenge