عشق کو بیچ میں یا رب تو نہ لایا ہوتا

عشق کو بیچ میں یا رب تو نہ لایا ہوتا

یا تن آدمی میں دل نہ بنایا ہوتا

دل نہ تھا ایسی جگہ جس کی نہ سدھ لیجے کبھو

اجڑی اس بستی کو پھر تو نے بسایا ہوتا

عزت اسلام کی کچھ رکھ لی خدا نے ورنہ

زلف نے تیری تو زنار بندھایا ہوتا

گھر کے آگے سے ترے نعش گئی عاشق کی

اپنے دروازے تلک تو بھی تو آیا ہوتا

جو ہے سو بے خود رفتار ہے تیرا اے شوخ

اس روش سے نہ قدم تو نے اٹھایا ہوتا

اب تو صد چند ستم کرنے لگے تم اے کاش

عشق اپنا نہ تمہیں میں نے جتایا ہوتا

دل سے خوش طرح مکاں پھر بھی کہیں بنتے ہیں

اس عمارت کو ٹک اک دیکھ کے ڈھایا ہوتا

دل پہ رکھتا ہوں کبھو سر سے کبھو ماروں ہوں

ہاتھ پاؤں کو نہ میں تیرے لگایا ہوتا

کم کم اٹھتا وہ نقاب آہ کہ طاقت رہتی

کاش یکبار ہمیں منہ نہ دکھایا ہوتا

میرؔ اظہار محبت میں گیا جی نہ ترا

ہائے نادان بہت تو نے چھپایا ہوتا