ji ki lag bala hai koi dil jine se uTha baiTho

jī kī laag balā hai koī dil jiine se uThā baiTho

ho ke faqīr galī meñ kisū kī ranj uThāo jā baiTho

kyā dekho ho āgā-pīchhā 'ishq agar fil-vāqe' hai

ek dam us be-chashm-o-rū kī teġh tale bhī jā baiTho

ek samāñ thā vasl kā us ke sej pe so.e phūloñ kī

ab hai zamān-e-firāq bichhaune ḳhār-o-ḳhasak ke bichhā baiTho

kaam kī sūrat apne pyāre kyā bigḌī hai kyā kahiye

aao kabhū muddat meñ yaañ to achchhe muñh ko banā baiTho

TeḌhī chaal se us kī ḳhā.if chupke khaḌe kyā phirte ho

sīdhī sīdhī do-chār us ko jur.at kar ke sunā baiTho

TeḌhī bhaveñ dushman pe karo ho 'ishq-o-havas meñ tamīz karo

yā'nī teġh-e-sitam ek us ko chalte phirte lagā baiTho

niklā ḳhat-e-pusht-e-lab us kā ḳhizr-o-masīhā marne lage

sochte kyā ho 'mīr' 'abas ab zahr mañgā kar khā baiTho

ji ki lag bala hai koi dil jine se uTha baiTho

ho ke faqir gali mein kisu ki ranj uThao ja baiTho

kya dekho ho aaga-pichha 'ishq agar fil-waqe' hai

ek dam us be-chashm-o-ru ki tegh tale bhi ja baiTho

ek saman tha wasl ka us ke sej pe soe phulon ki

ab hai zaman-e-firaq bichhaune KHar-o-KHasak ke bichha baiTho

kaam ki surat apne pyare kya bigDi hai kya kahiye

aao kabhu muddat mein yan to achchhe munh ko bana baiTho

TeDhi chaal se us ki KHaif chupke khaDe kya phirte ho

sidhi sidhi do-chaar us ko jurat kar ke suna baiTho

TeDhi bhawen dushman pe karo ho 'ishq-o-hawas mein tamiz karo

ya'ni tegh-e-sitam ek us ko chalte phirte laga baiTho

nikla KHat-e-pusht-e-lab us ka KHizr-o-masiha marne lage

sochte kya ho 'mir' 'abas ab zahr manga kar kha baiTho