jis sar ko ghurur aaj hai yan taj-wari ka

jis sar ko ġhurūr aaj hai yaañ tāj-varī kā

kal us pe yahīñ shor hai phir nauhagarī kā

sharminda tire ruḳh se hai ruḳhsār parī kā

chaltā nahīñ kuchh aage tire kabk-e-darī kā

āfāq kī manzil se gayā kaun salāmat

asbāb luTā raah meñ yaañ har safarī kā

zindāñ meñ bhī shorish na ga.ī apne junūñ kī

ab sañg mudāvā hai is āshufta-sarī kā

har zaḳhm-e-jigar dāvar-e-mahshar se hamārā

insāf-talab hai tirī bedād-garī kā

apnī to jahāñ aañkh laḌī phir vahīñ dekho

ā.īne ko lapkā hai pareshāñ-nazarī kā

sad mausam-e-gul ham ko tah-e-bāl hī guzre

maqdūr na dekhā kabhū be-bāl-o-parī kā

is rañg se jhamke hai palak par ki kahe tū

TukḌā hai mirā ashk aqīq-e-jigarī kā

kal sair kiyā ham ne samundar ko bhī jā kar

thā dast-e-nigar panja-e-mizhgāñ kī tarī kā

le saañs bhī āhista ki nāzuk hai bahut kaam

āfāq kī is kārgah-e-shīshagarī kā

Tuk 'mīr'-e-jigar-soḳhta kī jald ḳhabar le

kyā yaar bharosā hai charāġh-e-saharī kā

jis sar ko ghurur aaj hai yan taj-wari ka

kal us pe yahin shor hai phir nauhagari ka

sharminda tere ruKH se hai ruKHsar pari ka

chalta nahin kuchh aage tere kabk-e-dari ka

aafaq ki manzil se gaya kaun salamat

asbab luTa rah mein yan har safari ka

zindan mein bhi shorish na gai apne junun ki

ab sang mudawa hai is aashufta-sari ka

har zaKHm-e-jigar dawar-e-mahshar se hamara

insaf-talab hai teri bedad-gari ka

apni to jahan aankh laDi phir wahin dekho

aaine ko lapka hai pareshan-nazari ka

sad mausam-e-gul hum ko tah-e-baal hi guzre

maqdur na dekha kabhu be-baal-o-pari ka

is rang se jhamke hai palak par ki kahe tu

TukDa hai mera ashk aqiq-e-jigari ka

kal sair kiya hum ne samundar ko bhi ja kar

tha dast-e-nigar panja-e-mizhgan ki tari ka

le sans bhi aahista ki nazuk hai bahut kaam

aafaq ki is kargah-e-shishagari ka

Tuk 'mir'-e-jigar-soKHta ki jald KHabar le

kya yar bharosa hai charagh-e-sahari ka