jo motaqid nahin hai ali ke kamal ka

jo mo'taqid nahīñ hai alī ke kamāl kā

har baal us ke tan pe hai mūjib vabāl kā

izzat alī kī qadr alī kī bahut hai duur

morid hai zul-jalāl ke izz-o-jalāl kā

paayā alī ko jā ke mohammad ne us jagah

jis jā na thā lagāo gumān-o-ḳhayāl kā

rakhnā qadam pe us ke qadam kab malak se ho

maḳhlūq aadmī na huā aisī chaal kā

shaḳhsiyyat aisī kis kī thī ḳhatm-e-rusul ke baad

thā mashvarat-sharīk haq-e-lā-yazāl kā

toḌā butoñ ko dosh-e-nabī par qadam ko rakh

chhoḌā na naam ka.abe meñ kufr-o-zalāl kā

rāh-e-ḳhudā meñ un ne diyā apne bhī ta.iiñ

ye juud muñh to dekho kisū āshmāl kā

nisbat na bandagī kī huī jis kī vaañ durust

ronā mujhe hai hashr meñ us kī hī chaal kā

fikr-e-najāt 'mīr' ko kyā mad.h-ḳhvāñ hai vo

aulād kā alī kī mohammad kī aal kā

jo mo'taqid nahin hai ali ke kamal ka

har baal us ke tan pe hai mujib wabaal ka

izzat ali ki qadr ali ki bahut hai dur

morid hai zul-jalal ke izz-o-jalal ka

paya ali ko ja ke mohammad ne us jagah

jis ja na tha lagao guman-o-KHayal ka

rakhna qadam pe us ke qadam kab malak se ho

maKHluq aadmi na hua aisi chaal ka

shaKHsiyyat aisi kis ki thi KHatm-e-rusul ke baad

tha mashwarat-sharik haq-e-la-yazal ka

toDa buton ko dosh-e-nabi par qadam ko rakh

chhoDa na nam kabe mein kufr-o-zalal ka

rah-e-KHuda mein un ne diya apne bhi tain

ye jud munh to dekho kisu aashmal ka

nisbat na bandagi ki hui jis ki wan durust

rona mujhe hai hashr mein us ki hi chaal ka

fikr-e-najat 'mir' ko kya madh-KHwan hai wo

aulad ka ali ki mohammad ki aal ka