jun ghuncha mir itne na baiThe raha karo

juuñ ġhuncha 'mīr' itne na baiThe rahā karo

gul-phūl dekhne ko bhī Tuk uTh chalā karo

juuñ nai na zaar naale se ham ek dam raheñ

tum band band kyoñ na hamārā judā karo

sote ke sote yūñhī na rah jaa.eñ ham kabhū

āñkheñ idhar se muuñd na apnī liyā karo

saude meñ us ke bik ga.e aise ka.ī hazār

yūsuf kā shor duur hī se tum sunā karo

hote ho be-dimāġh to dekho ho Tuk idhar

ġhusse hī ham pe kaash ke aksar rahā karo

ye iztirāb dekh ki ab dushmanoñ se bhī

kahtā huuñ us ke milne kī kuchh tum du'ā karo

dam rukte haiñ siyāhī-e-mizhgāñ hī dekh kar

surma lagā ke aur hameñ mat ḳhafā karo

puurā kareñ haiñ vā'de ko apne ham āj-kal

vā'de ke tiiñ visāl ke tum bhī vafā karo

dushman haiñ apne jī ke tumhāre liye hue

tum bhī huqūq dostī ke kuchh adā karo

apnā chale to aaphī sitam sab uThā.iye

tum kaun chāhtā hai kisū par jafā karo

har chand saath jaan ke hai 'ishq 'mīr' lek

is dard-e-lā-‘ilāj kī kuchh to davā karo

jun ghuncha 'mir' itne na baiThe raha karo

gul-phul dekhne ko bhi Tuk uTh chala karo

jun nai na zar nale se hum ek dam rahen

tum band band kyon na hamara juda karo

sote ke sote yunhi na rah jaen hum kabhu

aankhen idhar se mund na apni liya karo

saude mein us ke bik gae aise kai hazar

yusuf ka shor dur hi se tum suna karo

hote ho be-dimagh to dekho ho Tuk idhar

ghusse hi hum pe kash ke aksar raha karo

ye iztirab dekh ki ab dushmanon se bhi

kahta hun us ke milne ki kuchh tum du'a karo

dam rukte hain siyahi-e-mizhgan hi dekh kar

surma laga ke aur hamein mat KHafa karo

pura karen hain wa'de ko apne hum aaj-kal

wa'de ke tin visal ke tum bhi wafa karo

dushman hain apne ji ke tumhaare liye hue

tum bhi huquq dosti ke kuchh ada karo

apna chale to aaphi sitam sab uThaiye

tum kaun chahta hai kisu par jafa karo

har chand sath jaan ke hai 'ishq 'mir' lek

is dard-e-la-‘ilaj ki kuchh to dawa karo