KHurshid tere chehre ke aagu na aa sake

ḳhurshīd tere chehre ke aagū na aa sake

us ko jigar bhī shart hai jo taab lā sake

ham garm-rau haiñ rāh-e-fanā ke sharar-sifat

aise na jā.eñge ki koī khoj pā sake

ġhāfil na rahiyo āh-e-za.īfoñ se sar-kashāñ

tāqat hai is ko ye ki jahāñ ko jalā sake

merā jo bas chale to munādī kiyā karūñ

tā ab se dil na koī kisū se lagā sake

tadbīr-e-jeb-e-pāra nahīñ kartī fā.eda

nāseh jigar kā chaak silā jo silā sake

us kā kamāl charḳh pe sar khīñchtā nahīñ

apne ta.iiñ jo ḳhaak meñ koī milā sake

ye teġh hai ye tasht hai ye tū hai bul-havas

khānā tujhe harām hai jo zaḳhm khā sake

is rashk-e-āftāb ko dekhe to sharm se

māh-e-falak na shahr meñ muñh ko dikhā sake

qaaf

kyā dil-fareb jaa.e hai āfāq ham-nashīñ

do din ko yaañ jo aa.e so barsoñ na jā sake

mush'ir hai is pe murdan-e-dushvār-e-raftagāñ

ya.anī jahāñ se dil ko na āsāñ uThā sake

badlūñgā is ġhazal ke bhī maiñ qāfiye ko 'mīr'

phir fikr go na ohde se is ke bar aa sake

KHurshid tere chehre ke aagu na aa sake

us ko jigar bhi shart hai jo tab la sake

hum garm-rau hain rah-e-fana ke sharar-sifat

aise na jaenge ki koi khoj pa sake

ghafil na rahiyo aah-e-zaifon se sar-kashan

taqat hai is ko ye ki jahan ko jala sake

mera jo bas chale to munadi kiya karun

ta ab se dil na koi kisu se laga sake

tadbir-e-jeb-e-para nahin karti faeda

naseh jigar ka chaak sila jo sila sake

us ka kamal charKH pe sar khinchta nahin

apne tain jo KHak mein koi mila sake

ye tegh hai ye tasht hai ye tu hai bul-hawas

khana tujhe haram hai jo zaKHm kha sake

is rashk-e-aftab ko dekhe to sharm se

mah-e-falak na shahr mein munh ko dikha sake

qaf

kya dil-fareb jae hai aafaq ham-nashin

do din ko yan jo aae so barson na ja sake

mush'ir hai is pe murdan-e-dushwar-e-raftagan

yani jahan se dil ko na aasan uTha sake

badlunga is ghazal ke bhi main qafiye ko 'mir'

phir fikr go na ohde se is ke bar aa sake