kya main bhi pareshani-e-KHatir se qarin tha

kyā maiñ bhī pareshānī-e-ḳhātir se qarīñ thā

āñkheñ to kahīñ thiiñ dil-e-ġham-dīda kahīñ thā

kis raat nazar kī hai soī chashmak-e-anjum

āñkhoñ ke tale apne to vo māh-jabīñ thā

aayā to sahī vo koī dam ke liye lekin

hoñToñ pe mire jab nafas bāz-pasīñ thā

ab koft se hijrāñ kī jahāñ tan pe rakhā haath

jo dard-o-alam thā so kahe tū ki vahīñ thā

jaanā nahīñ kuchh juz ġhazal aa kar ke jahāñ meñ

kal mere tasarruf meñ yahī qita-e-zamīñ thā

naam aaj koī yaañ nahīñ letā hai unhoñ kā

jin logoñ ke kal mulk ye sab zer-e-nagīñ thā

masjid meñ imaam aaj huā aa ke vahāñ se

kal tak to yahī 'mīr' ḳharābāt-nashīñ thā

kya main bhi pareshani-e-KHatir se qarin tha

aankhen to kahin thin dil-e-gham-dida kahin tha

kis raat nazar ki hai soi chashmak-e-anjum

aankhon ke tale apne to wo mah-jabin tha

aaya to sahi wo koi dam ke liye lekin

honTon pe mere jab nafas baz-pasin tha

ab koft se hijran ki jahan tan pe rakha hath

jo dard-o-alam tha so kahe tu ki wahin tha

jaana nahin kuchh juz ghazal aa kar ke jahan mein

kal mere tasarruf mein yahi qita-e-zamin tha

nam aaj koi yan nahin leta hai unhon ka

jin logon ke kal mulk ye sab zer-e-nagin tha

masjid mein imam aaj hua aa ke wahan se

kal tak to yahi 'mir' KHarabaat-nashin tha