mailan-e-dil hai zulf-e-siyah-fam ki taraf

mailān-e-dil hai zulf-e-siyah-fām kī taraf

jaatā hai said aap se us daam kī taraf

dil apnā adl-e-dāvar-e-mahshar se jam.a hai

kartā hai kaun āshiq-e-badnām kī taraf

is pahlū-e-figār ko bistar se kaam kyā

muddat huī ki chhūTī hai ārām kī taraf

yak shab nazar paḌā thā kahīñ tū so ab mudām

rahtī hai chashm-e-māh tire baam kī taraf

āñkheñ jinhoñ kī zulf-o-ruḳh-e-yār se lagīñ

ve dekhte nahīñ sahar-o-shām kī taraf

juuñ chashm-e-yār bazm meñ uglā paḌe hai aaj

Tuk dekh shaiḳh mai ke bhare jaam kī taraf

ḳhārā-shigāf o sīna-ḳharāsh ek se nahīñ

lekin nazar nahīñ hai tujhe kaam kī taraf

dil pak rahe haiñ jin ke unhīñ se hameñ hai shauq

mailān-e-tab.a kab hai kisū ḳhaam kī taraf

dekhī hai jab se us but-e-kāfir kī shakl 'mīr'

jaatā nahīñ hai jī tanik islām kī taraf

mailan-e-dil hai zulf-e-siyah-fam ki taraf

jata hai said aap se us dam ki taraf

dil apna adl-e-dawar-e-mahshar se jama hai

karta hai kaun aashiq-e-badnam ki taraf

is pahlu-e-figar ko bistar se kaam kya

muddat hui ki chhuTi hai aaram ki taraf

yak shab nazar paDa tha kahin tu so ab mudam

rahti hai chashm-e-mah tere baam ki taraf

aankhen jinhon ki zulf-o-ruKH-e-yar se lagin

we dekhte nahin sahar-o-sham ki taraf

jun chashm-e-yar bazm mein ugla paDe hai aaj

Tuk dekh shaiKH mai ke bhare jam ki taraf

KHara-shigaf o sina-KHarash ek se nahin

lekin nazar nahin hai tujhe kaam ki taraf

dil pak rahe hain jin ke unhin se hamein hai shauq

mailan-e-taba kab hai kisu KHam ki taraf

dekhi hai jab se us but-e-kafir ki shakl 'mir'

jata nahin hai ji tanik islam ki taraf