میلان دل ہے زلف سیہ فام کی طرف

میلان دل ہے زلف سیہ فام کی طرف

جاتا ہے صید آپ سے اس دام کی طرف

دل اپنا عدل داور محشر سے جمع ہے

کرتا ہے کون عاشق بدنام کی طرف

اس پہلوئے فگار کو بستر سے کام کیا

مدت ہوئی کہ چھوٹی ہے آرام کی طرف

یک شب نظر پڑا تھا کہیں تو سو اب مدام

رہتی ہے چشم ماہ ترے بام کی طرف

آنکھیں جنہوں کی زلف و رخ یار سے لگیں

وے دیکھتے نہیں سحر و شام کی طرف

جوں چشم یار بزم میں اگلا پڑے ہے آج

ٹک دیکھ شیخ مے کے بھرے جام کی طرف

خارا شگاف و سینہ خراش ایک سے نہیں

لیکن نظر نہیں ہے تجھے کام کی طرف

دل پک رہے ہیں جن کے انہیں سے ہمیں ہے شوق

میلان طبع کب ہے کسو خام کی طرف

دیکھی ہے جب سے اس بت کافر کی شکل میرؔ

جاتا نہیں ہے جی تنک اسلام کی طرف