maks-e-tale dekh wo idhar ko chal kar rah gaya

maks-e-tāle' dekh vo īdhar ko chal kar rah gayā

raat jo thī chāñd sā ghar se nikal kar rah gayā

ḳhvāb meñ kal paañv apne dost ke maltā thā maiñ

aañkh dushman khul ga.ī so haath mal kar rah gayā

ham to the sargarm-e-pā-bosī ḳhudā ne ḳhair kī

nīmcha kal ḳhush-ġhilāf us kā ugal kar rah gayā

ham bhī duniyā kī talab meñ sar ke bal hote khaḌe

baare apnā paañv us rah meñ bichal kar rah gayā

kyā kahūñ betābī-e-shab se ki nā-chār us baġhair

dil mire siine meñ do-do haath uchhal kar rah gayā

kyā hamīñ ko yaar ke teġhe ne khā kar dam liyā

aise bahuteroñ ko ye azhdar nigal kar rah gayā

do qadam saath us jafā-jū ke chalā jaatā hai jī

bul-havas ayyār thā dekhā na Tal kar rah gayā

aañkh kuchh apnī hī us ke sāmne hotī nahīñ

jin ne vo ḳhuñḳhār saj dekhī dahal kar rah gayā

ek Dherī raakh kī thī sub.h jā-e-'mīr' par

barsoñ se jaltā thā shāyad raat jal kar rah gayā

maks-e-tale' dekh wo idhar ko chal kar rah gaya

raat jo thi chand sa ghar se nikal kar rah gaya

KHwab mein kal panw apne dost ke malta tha main

aankh dushman khul gai so hath mal kar rah gaya

hum to the sargarm-e-pa-bosi KHuda ne KHair ki

nimcha kal KHush-ghilaf us ka ugal kar rah gaya

hum bhi duniya ki talab mein sar ke bal hote khaDe

bare apna panw us rah mein bichal kar rah gaya

kya kahun betabi-e-shab se ki na-chaar us baghair

dil mere sine mein do-do hath uchhal kar rah gaya

kya hamin ko yar ke teghe ne kha kar dam liya

aise bahuteron ko ye azhdar nigal kar rah gaya

do qadam sath us jafa-ju ke chala jata hai ji

bul-hawas ayyar tha dekha na Tal kar rah gaya

aankh kuchh apni hi us ke samne hoti nahin

jin ne wo KHunKHar saj dekhi dahal kar rah gaya

ek Dheri rakh ki thi subh ja-e-'mir' par

barson se jalta tha shayad raat jal kar rah gaya