موئے ہم جس کی خاطر بے وفا تھا

موئے ہم جس کی خاطر بے وفا تھا

نہ جانا ان نے تو یوں بھی کہ کیا تھا

معالج کی نہیں تقصیر ہرگز

مرض ہی عاشقی کا لا دوا تھا

نہ خود سر کیونکے ہوں ہم یار اپنا

خود آرا خود پسند و خود ستا تھا

رکھا تھا منہ کبھو اس کنج لب پر

ہمارے ذوق میں اب تک مزہ تھا

نہ ملیو چاہنے والوں سے اپنے

نہ جانا تجھ سے یہ کن نے کہا تھا

پریشاں کر گئی فریاد بلبل

کسو سے دل ہمارا پھر لگا تھا

ملے برسوں وہی بیگانگی تھی

ہمارے زعم میں وہ آشنا تھا

نہ دیوانے تھے ہم سے قیس و فرہاد

ہمارا طور‌ عشق ان سے جدا تھا

بدن میں صبح سے تھی سنسناہٹ

انہیں سناہٹوں میں جی جلا تھا

صنم خانے سے اٹھ کعبے گئے ہم

کوئی آخر ہمارا بھی خدا تھا

بدن میں اس کے ہے ہر جائے دل کش

جہاں اٹکا کسو کا دل بجا تھا

کوئی عنقا سے پوچھے نام تیرا

کہاں تھا جب کہ میں رسوا ہوا تھا

چڑھی تیوری چمن میں میرؔ آیا

کلک خسپ آج شاید کچھ خفا تھا