mue hum jis ki KHatir bewafa tha

mue ham jis kī ḳhātir bevafā thā

na jaanā un ne to yuuñ bhī ki kyā thā

muālij kī nahīñ taqsīr hargiz

maraz hī āshiqī kā lā-davā thā

na ḳhud-sar kyūñke hoñ ham yaar apnā

ḳhud-ārā ḳhud-pasand-o-ḳhud-satā thā

rakhā thā muñh kabhū us kunj-e-lab par

hamāre zauq meñ ab tak maza thā

na miliyo chāhne vāloñ se apne

na jaanā tujh se ye kin ne kahā thā

pareshāñ kar ga.ī fariyād-e-bulbul

kisū se dil hamārā phir lagā thā

mile barsoñ vahī begānagī thī

hamāre zo.am meñ vo āshnā thā

na dīvāne the ham se qais-o-farhād

hamārā taur-e-ishq un se judā thā

badan meñ sub.h se thī sansanāhaT

inhīñ sannāhaToñ meñ jī jalā thā

sanam-ḳhāne se uTh ka.abe ga.e ham

koī āḳhir hamārā bhī ḳhudā thā

badan meñ us ke hai har jaa.e dilkash

jahāñ aTkā kisū kā dil bajā thā

koī anqā se pūchhe naam terā

kahāñ thā jab ki maiñ rusvā huā thā

chaḌhī tyorī chaman meñ 'mīr' aaya

kalak-ḳhusp aaj shāyad kuchh ḳhafā thā

mue hum jis ki KHatir bewafa tha

na jaana un ne to yun bhi ki kya tha

mualij ki nahin taqsir hargiz

maraz hi aashiqi ka la-dawa tha

na KHud-sar kyunke hon hum yar apna

KHud-ara KHud-pasand-o-KHud-sata tha

rakha tha munh kabhu us kunj-e-lab par

hamare zauq mein ab tak maza tha

na miliyo chahne walon se apne

na jaana tujh se ye kin ne kaha tha

pareshan kar gai fariyaad-e-bulbul

kisu se dil hamara phir laga tha

mile barson wahi beganagi thi

hamare zoam mein wo aashna tha

na diwane the hum se qais-o-farhad

hamara taur-e-ishq un se juda tha

badan mein subh se thi sansanahaT

inhin sannahaTon mein ji jala tha

sanam-KHane se uTh kabe gae hum

koi aaKHir hamara bhi KHuda tha

badan mein us ke hai har jae dilkash

jahan aTka kisu ka dil baja tha

koi anqa se puchhe nam tera

kahan tha jab ki main ruswa hua tha

chaDhi tyori chaman mein 'mir' aaya

kalak-KHusp aaj shayad kuchh KHafa tha