mutrib se ghazal mir ki kal maine paDhai

mutrib se ġhazal 'mīr' kī kal maiñ ne paḌhā.ī

allah re asar sab ke ta.iiñ raftagī aa.ī

us matl.a-e-jāñ-soz ne aa us ke laboñ par

kyā kahiye ki kyā sūfiyoñ kī chhātī jalā.ī

ḳhātir ke ilāqe ke sabab jaan khapā.ī

is dil ke dhaḌakne se ajab koft uThā.ī

go us ruḳh-e-mahtābī se vaañ chāñdnī chhiTkī

yaañ rang-e-shikasta se bhī chhuTtī hai havā.ī

har bahr meñ ash.ār kahe umr ko khoyā

us gauhar-e-nāyāb kī kuchh baat na paa.ī

bhīḌeñ Talīñ us abrū-e-ḳhamdār ke hilte

lākhoñ meñ us aubāsh ne talvār chalā.ī

dil aur jigar jal ke mire donoñ hue ḳhaak

kyā pūchhte ho ishq ne kyā aag lagā.ī

qāsid ke tasanño ne kiyā dil ke ta.iiñ daaġh

betāb mujhe dekh ke kuchh baat banā.ī

chipkī hai mirī aañkh lab-e-la.al-e-butāñ se

is baat ke tiiñ jāntī hai saarī ḳhudā.ī

maiñ dair pahuñch kar na kiyā qasd-e-haram phir

apnī sī jaras ne kī bahut harza-darā.ī

fariyād inhīñ rangoñ hai gulzār meñ har sub.h

bulbul ne mirī tarz-e-suḳhan saaf uḌaa.ī

majlis meñ mire hote rahā karte ho chupke

ye baat mirī zid se tumheñ kin ne batā.ī

gardish meñ jo haiñ 'mīr' mah-o-mehr-o-sitāre

din-rāt hameñ rahtī hai ye chasm-numā.ī

mutrib se ghazal 'mir' ki kal main ne paDhai

allah re asar sab ke tain raftagi aai

us matla-e-jaan-soz ne aa us ke labon par

kya kahiye ki kya sufiyon ki chhati jalai

KHatir ke ilaqe ke sabab jaan khapai

is dil ke dhaDakne se ajab koft uThai

go us ruKH-e-mahtabi se wan chandni chhiTki

yan rang-e-shikasta se bhi chhuTti hai hawai

har bahr mein ashaar kahe umr ko khoya

us gauhar-e-nayab ki kuchh baat na pai

bhiDen Talin us abru-e-KHamdar ke hilte

lakhon mein us aubash ne talwar chalai

dil aur jigar jal ke mere donon hue KHak

kya puchhte ho ishq ne kya aag lagai

qasid ke tasanno ne kiya dil ke tain dagh

betab mujhe dekh ke kuchh baat banai

chipki hai meri aankh lab-e-lal-e-butan se

is baat ke tin jaanti hai sari KHudai

main dair pahunch kar na kiya qasd-e-haram phir

apni si jaras ne ki bahut harza-darai

fariyaad inhin rangon hai gulzar mein har subh

bulbul ne meri tarz-e-suKHan saf uDai

majlis mein mere hote raha karte ho chupke

ye baat meri zid se tumhein kin ne batai

gardish mein jo hain 'mir' mah-o-mehr-o-sitare

din-raat hamein rahti hai ye chasm-numai