nikle hai chashma jo koi josh-e-zanan pani ka

nikle hai chashma jo koī josh-e-zanāñ paanī kā

yaad vo hai vo kaso chashm kī giryānī kā

lutf agar ye hai butāñ sandal peshānī kā

husn kyā sub.h ke phir chehra-e-nūrānī kā

kufr kuchh chāhiye islām kī raunaq ke liye

husn zunnār hai tasbīh-e-sulaimānī kā

darhamī haal kī hai saare mire dīvāñ meñ

sair kar tū bhī ye majmūa pareshānī kā

jaan ghabrātī hai andoh se tan meñ kyā kyā

tañg ahvāl hai us yūsuf-e-zindānī kā

khel laḌkoñ kā samajhte the mohabbat ke ta.iiñ

hai baḌā haif hameñ apnī bhī nādānī kā

vo bhī jaane ki lahū ro ke likhā hai maktūb

ham ne sar naama kiyā kāġhaz afshānī kā

us kā muñh dekh rahā huuñ so vahī dekhūñ huuñ

naqsh kā sā hai samāñ merī bhī hairānī kā

but-parastī ko to islām nahīñ kahte haiñ

mo'taqid kaun hai 'mīr' aisī musalmānī kā

nikle hai chashma jo koi josh-e-zanan pani ka

yaad wo hai wo kaso chashm ki giryani ka

lutf agar ye hai butan sandal peshani ka

husn kya subh ke phir chehra-e-nurani ka

kufr kuchh chahiye islam ki raunaq ke liye

husn zunnar hai tasbih-e-sulaimani ka

darhami haal ki hai sare mere diwan mein

sair kar tu bhi ye majmua pareshani ka

jaan ghabraati hai andoh se tan mein kya kya

tang ahwal hai us yusuf-e-zindani ka

khel laDkon ka samajhte the mohabbat ke tain

hai baDa haif hamein apni bhi nadani ka

wo bhi jaane ki lahu ro ke likha hai maktub

hum ne sar nama kiya kaghaz afshani ka

us ka munh dekh raha hun so wahi dekhun hun

naqsh ka sa hai saman meri bhi hairani ka

but-parasti ko to islam nahin kahte hain

mo'taqid kaun hai 'mir' aisi musalmani ka