saqi ki bagh par jo kuchh kam-nigahiyan hain

saaqī kī baaġh par jo kuchh kam-nigāhiyāñ haiñ

mānind-e-jām-e-ḳhālī gul sab jamāhiyāñ haiñ

teġh-e-jafā-e-ḳhūbāñ be-āb thī ki hamdam

zaḳhm-e-badan hamāre tafsīda māhiyāñ haiñ

masjid se mai-kade par kaash abr roz barse

vaañ rū-safediyāñ haiñ yaañ rū-siyāhiyāñ haiñ

jis kī nazar paḌī haiñ un ne mujhe bhī dekhā

jab se vo shoḳh āñkheñ maiñ ne sarāhiyāñ haiñ

ġhālib to ye hai zāhid rahmat se duur hove

darkār vaañ gunah haiñ yaañ be-gunāhiyāñ haiñ

ye nāz-o-sargirānī allāh re ki har dam

nāzuk-mizājiyāñ haiñ yā kaj-kulāhiyāñ haiñ

shāhid luuñ 'mīr' kis ko ahl-e-mohalla se maiñ

mahzar pe ḳhuuñ ke mere sab kī gavāhiyāñ haiñ

saqi ki bagh par jo kuchh kam-nigahiyan hain

manind-e-jam-e-KHali gul sab jamahiyan hain

tegh-e-jafa-e-KHuban be-ab thi ki hamdam

zaKHm-e-badan hamare tafsida mahiyan hain

masjid se mai-kade par kash abr roz barse

wan ru-safediyan hain yan ru-siyahiyan hain

jis ki nazar paDi hain un ne mujhe bhi dekha

jab se wo shoKH aankhen main ne sarahiyan hain

ghaalib to ye hai zahid rahmat se dur howe

darkar wan gunah hain yan be-gunahiyan hain

ye naz-o-sargirani allah re ki har dam

nazuk-mizajiyan hain ya kaj-kulahiyan hain

shahid lun 'mir' kis ko ahl-e-mohalla se main

mahzar pe KHun ke mere sab ki gawahiyan hain