saKHt be-rahm aah qatil hai

saḳht be-rahm aah qātil hai

merī ḳhūñ-rezī hī kā maa.il hai

daur majnūñ kā ho gayā āḳhir

yaañ junūñ kā abhī avā.il hai

nikle is raah kis tarah vo maah

na to tāle' na jazb-e-kāmil hai

misl-e-sūrat haiñ jalve ke hairāñ

haa.e kyā shakl kyā shamā.il hai

haath rakh leve to kahe ki bas ab

kyā jiyegā bahut ye ghā.il hai

haq meñ us but ke bad kaheñ kyūñkar

vo hamārā ḳhudā-e-bātil hai

sach hai rāhat to baa'd marne ke

par baḌā vāqi'a ye haa.il hai

teġh agar darmiyāñ rahe to rahe

yaar merā javān jāhil hai

rū nahīñ chashm-e-tar se ab rakhiye

sail isī dar kā kab se saa.il hai

haal ham Dūbtoñ kā kyā jaane

jis ko dariyā pe sair-e-sāhil hai

'mīr' kab tak ba-hāl-e-marg jiyeñ

kuchh bhī is zindagī kā hāsil hai

saKHt be-rahm aah qatil hai

meri KHun-rezi hi ka mail hai

daur majnun ka ho gaya aaKHir

yan junun ka abhi awail hai

nikle is rah kis tarah wo mah

na to tale' na jazb-e-kaamil hai

misl-e-surat hain jalwe ke hairan

hae kya shakl kya shamail hai

hath rakh lewe to kahe ki bas ab

kya jiyega bahut ye ghail hai

haq mein us but ke bad kahen kyunkar

wo hamara KHuda-e-baatil hai

sach hai rahat to ba'd marne ke

par baDa waqi'a ye hail hai

tegh agar darmiyan rahe to rahe

yar mera jawan jahil hai

ru nahin chashm-e-tar se ab rakhiye

sail isi dar ka kab se sail hai

haal hum Dubton ka kya jaane

jis ko dariya pe sair-e-sahil hai

'mir' kab tak ba-haal-e-marg jiyen

kuchh bhi is zindagi ka hasil hai